Smnewstl.com- GLENO, 18 Marsu 2023- Ekipa Klube feto no mane Camara Comersiu Industria (CCI-Ermera) sai kampiaun ba jogu final futsal Taça Xanana CUP ne’ebé realiza iha Munisipiu Ermera.
Ekipa CCI mane sai kampiaun hafoin halakon ekipa Klube Edukasaun Ermera ho golu 6-3. Enkuandu ekipa femina CCI-Ermera sai kampiaun hafoin halakon ekipa femenina Klube Gleno Vila ho golu 6-2.
Entretantu ba kampiaun datoluk hosi ekipa mane Klube Autoridade Ermera no kuartu lugar ekipa Klube PDN no jogu hosi feto klube Emarui hetan terseiru lugar no kuarta lugar okupa hosi klube feto SRH Catholic.
Iha jogu Modalidade Juvinil Mane tinan 11, primeiru lugar hosi ekipa Klube Bairo Seis, segund lugar Klube Bulgaria, Terseiru Lugar ekipa PLN no kuartu lugar ekipa Cape-Deh.
Ba manan na’in sira haksolok hamutuk ho adeptu sira kontinua simu kedas taxa no osan ne’ebé entrega direita hosi Lider Istóriku nu’udar mós Prezidente Klube SLB Benfica Laulara, Kay Rala Xanana Gusmão no Fransisco Kalbuadi lai hamutuk ho autoridade Ermera, Komandu PNTL no F-FDTL.
Jogu ho tema “Hametin Fraternidade Umana Liu Hosi Jogu Desportiva” ne’e rasik Xanana abertura loron 28 Janeiru 2023 hetan partisipasaun masimu hosi ekipa klube feto mane hamutuk 38.
Treinador Klube CCI-Ermera, Egio Babo hato’o agradese ba Xanana Gusmão ne’ebé realiza jogu amizade ho nu’udar pasu ida hodi hametin unidade juventude kria paz ba malu no buka fini jagador di’ak hodi promove foin sa’e sira nia talentu iha desportu futebol.
“Ida ne’e pasu importante ida hodi bele hametin liután unidade juventude sira nian, no ohin ami ekipa CCI-Ermera sai kampiaun iha jogu feto mane nian nu’udar solok boot ba ekipa tomak hodi hato’o agradese ba Avo Nana ne’ebé realiza jogu ne’e iha Timor laran tomak inklui Ermera,” nia agradese.
Xanana: Jogu Ne’e Atu Hametin Unidade Juventude
Fatin hanesan, Lider Istoriku, Xanana hato’o agradese ba partisipasaun foin sa’e sira hodi hatudu sira nia talentu liu hosi jogu.
Xanana dehan, jogu ne’e ho objetivu atu hametin dame no unidade entre joven sira.
“Kontente mai taka jogu ne’e, atu ita bele intensiva feto sira no labarik sira nia hakarak ba desportu, ho deportu ita bele hatudu talentu, desportu meiu ida atu ita fahe domin hodi asegura dame iha ita nia rai ne’e,” dehan Xanana
Prezidente Klube SLB Laulara Benfica hatutan, ekipa ne’ebé lakon labele lakon esperansa, tanba jogu ne’e sei kontinua iha kada tinan.
“Iha desportu manan ka lakon, la’òs problema, importante atu ita mós partisipa, tinan seluk sei kontinua nafatin ita hotu dezenvolve di’ak liutan ita nia talentu, feto oan sira ohin ha’u haree imi nia jogu, kualidade individual kapas, nu’udar ekipa ita sei treinu dala barak liutan,” nia hatete.
Xanana kontinua motiva foin sa’e sira atu treinu nafatin mezmu la iha kompetisaun hodi sira bele aumenta sira nia potensiál domina bola kampo, no potensia pasa bola entre ekipa hodi fó susesu iha jogu.
Durante jogu hetan seguransa masimu hosi ekipa PNTL no F-FDTL inklui kontribuisaun hodi autoridade no sosiedade sira iha Ermera.(Smnews)
Komentariu