SMnewstl.com || DILI, 17 Agostu 2026 — Insidente tiru ne’ebé akontese iha Suku Irabin de Baixo, Postu Administrativu Uatucarbau, Munisípiu Viqueque, iha loron 15 Agostu 2026, taka ho triajedia, hafoin jovem ne’ebé hetan tiru hakotu ona iis iha Hospitál Nasionál Guido Valadares (HNGV), iha Segunda-feira dader ne’e, tanba kondisaun kanek grave.
Insidente ne’e hamosu preokupasaun boot hosi públiku, liuliu família, komunidade no organizasaun estudante, ne’ebé husu atu kazu ne’e investiga ho rigor no transparénsia.
Liu hosi konferénsia imprensa, Uniaun Estudante Universitáriu Munisípiu Viqueque (UEUMV) hato’o krítika kona-ba kazu ne’e no kestiona atuasaun membru PNTL ne’ebé alegadamente envolve iha insidente tiru.
UEUMV husu autoridade kompetente atu hala’o investigasaun rigorozu, independente no transparente, hodi determina kronolojia akontesimentu, faktu no responsabilidade hosi parte hotu ne’ebé envolve iha kazu ne’e.
“Ami lakohi kazu ida ne’e husik de’it. Ami husu investigasaun ne’ebé kle’an no transparente, tanba ema ida lakon nia vida no família presiza hatene faktu loos kona-ba saida mak akontese,” afirma porta-voz UEUMV, Apolinario da Cruz, iha konferénsia imprensa ne’ebé realiza iha Jardim 5 de Maio, Dili, Segunda-feira ne’e.
UEUMV mos apela ba PNTL atu hametin profesionalizmu, disiplinu no responsabilidade iha ezekusaun knaar, liuliu bainhira uza arma de fogo iha situasaun ne’ebé envolve sidadaun sivíl.
Organizasaun estudante ne’e subliña katak seguransa públika tenke hala’o ho respeitu ba direitu umanu no tuir prosedimentu legal. Tanba ne’e, UEUMV husu atu prosesu investigasaun ba kazu tiru ne’e hala’o ho transparénsia, hodi evita dúvida no suspeita iha komunidade.
“PNTL hanesan instituisaun ne’ebé iha responsabilidade atu proteje sidadaun. Se iha membru ida mak envolve iha kazu ne’e, tenke iha prosesu investigasaun no responsabilizasaun tuir lei,” afirma UEUMV.
Enkuantu UEUMV mos konsidera katak atuasaun ne’ebé viola lei no ameasa seguransa sidadaun la bele tolera iha Estadu Direitu. Porta-voz UEUMV, Cedelizio Koutchay Moniz, hatete katak alegadu hahalok membru ne’ebé envolve iha insidente ne’e bele konsidera hanesan hahalok kriminozu no bandalismu, no la merese atu akontese iha nasaun ne’e.
“Hahalok hanesan ne’e, se loos duni akontese, mak kriminozu no bandalismu. Hahalok ne’ebé ameasa vida no seguransa sidadaun la merese atu aplika iha nasaun ida ne’ebé hakarak hametin Estadu Direitu,” afirma Cedelizio.
Enkuantu ne’e, prosesu investigasaun hosi autoridade kompetente sei determina kronolojia kompleta kona-ba insidente, inklui circunstánsia ne’ebé lori ba akontesimentu tiru no responsabilidade legal hosi parte sira ne’ebé envolve.
UEUMV espera katak investigasaun bele hala’o ho independente, rigor no transparénsia, atu família vítima no públiku hetan klarifikasaun kona-ba faktu loos hosi kazu ne’e no garante katak prosesu legal lao tuir lei.(SMnews)
Komentariu