Smnewtl.com, Dili 11 Novembro 2026-Primeiru-Ministru Kay Rala Xanana Gusmão afirma katak,ró-ahi Fugro ne’ebé iha Portu Tibar sei hala’o peskiza jeofízika iha tasi Timor, ho objetivu atu identifika rota pipeline gás hosi kampu Greater Sunrise mai Timor-Leste, nu’udar parte husi preparasaun ba dezenvolvimentu infraestrutura petrolífera iha futuru.
Asuntu ne’e sai parte husi esplikasaun téknika ne’ebé Vise-Prezidente ba Dezenvolvimentu Greater Sunrise iha TIMOR GAP, E.P., Domingos Lequisiga Maria, hamutuk ho Asesór Tékniku Unidade Jestaun Projetu (PMU) ba Instalasaun Marítima (Marine Facility) iha Ministériu Petróleu no Rekursus Minerais (MPRM), Juvelino Sequeira, fó ba deputadu Parlamentu Nasionál.
Esplikasaun ne’e hala’o iha kuarta-feira (11/11/2026), durante debate iha faze generalidade Proposta Lei Orsamentu Jerál Estadu (OJE) 2027. Iha okaziaun ne’e, PM Xanana konvida deputadu sira atu vizita Portu Tibar hodi haree diretamente ró-ahi Fugro no ekipamentu tékniku ne’ebé sei uza iha peskiza tasi Timor.
Ró-ahi ne’e mai husi empreza Fugro Singapore Marine Pte. Ltd., ne’ebé Governu kontrata atu hala’o peskiza jeofízika ho rezolusaun aas (High Resolution Geophysical Survey), hodi identifika rota pipeline gás hosi kampu Greater Sunrise mai Timor-Leste.
Peskiza jeofízika ne’e nu’udar etapa dahuluk husi programa investigasaun mariña, ne’ebé sei fó dadus tékniku kona-ba rota pipeline no kondisaun fundu tasi. Dadus hirak ne’e importante atu apoia planeamentu no avaliasaun téknika antes instalasaun pipeline iha futuru.
Alémde kampu Greater Sunrise, peskiza ne’e sei kobre mós rota pipeline hosi kampu Bayu-Undan no Chuditch ba Natarbora, ho objetivu atu prepara baze téknika ba dezenvolvimentu infraestrutura gás iha kosta súl Timor-Leste.
Governu aloka ona orsamentu hamutuk US$ 12 millaun ba peskiza jeofízika ne’e, ne’ebé sei hala’o durante fulan haat. Depois remata etapa ne’e, prosesu investigasaun sei kontinua ho estudu jeotékniku iha tinan 2027.
Estudu jeotékniku sei permite avalia kondisaun rai no fundu tasi ho kle’an liután, atu asegura katak projetu instalasaun pipeline iha futuru bazeia ba dadus tékniku no konsiderasaun seguransa.
Infraestrutura pipeline gás konsidera nu’udar elementu importante ba dezenvolvimentu setór petróleu no gás iha Timor-Leste, tanba sei kria ligasaun entre kampu gás offshore no instalasaun iha rai-laran, hodi suporta dezenvolvimentu indústria petrolífera iha kosta súl.
Liuhusi peskiza ne’e, Governu hakarak asegura katak preparasaun ba infraestrutura petrolífera iha futuru iha baze téknika ne’ebé apropriadu, nu’udar parte husi esforsu atu dezenvolve rekursu naturál no hametin ekonomia nasionál.
Komentariu