Smnewstl.com, Dili 11 Novembro 2026-Timor-Leste no Reinu Tailándia kontinua hametin parseria bilateral iha área defeza no seguransa, ho posibilidade atu loke oportunidade ba pesoál Falintil-Força Defeza Timor-Leste (F-FDTL) atu partisipa hamutuk ho militár Tailándia iha misaun manutensaun dame Nasoins Unidas (ONU) iha futuru.
Asuntu ne’e sai parte importante husi enkontru entre Primeiru-Ministru Kay Rala Xanana Gusmão no Xefe Forsa Defeza Reinu Tailándia, Jeneral Ukris Boontanondha, iha salaun enkontru Gabinete Fronteira Terrestre no Marítima, Palásiu Governu, Dili, iha kuarta-feira (11/11/2026).
Hafoin enkontru, Jeneral Ukris Boontanondha hateten katak Governu Tailándia no Governu Timor-Leste iha interese komún atu hametin kooperasaun bilateral, liuliu iha preparasaun rekursu umanu, treinamentu militár, operasaun manutensaun dame no asisténsia umanitária.
Nia esplika katak enkontru ne’e mós diskute kona-ba planu atu selebra aniversáriu tinan 25 relasaun diplomátika entre nasaun rua. Nu’udar parte husi preparasaun ne’e, Timor-Leste no Tailándia iha ideia atu dezenvolve Memorandu Entendimentu (MoU) kona-ba dezenvolvimentu kapasidade entre Forsa Armada Tailándia no F-FDTL.
Kooperasaun ne’e sei foka ba edukasaun militár, treinamentu, interkámbiu peritu no partisipasaun iha operasaun manutensaun dame, atu hasa’e koñesimentu no kapasidade profisionál pesoál militár husi nasaun rua.
Jeneral Ukris Boontanondha afirma katak Tailándia kontribui ona ba treinamentu no formasaun pesoál militár Timor-Leste kona-ba operasaun manutensaun dame. Iha futuru, iha mós posibilidade atu envolve F-FDTL hamutuk ho militár Tailándia iha misaun manutensaun dame ONU.
“Iha área manutensaun dame, Tailándia informa katak durante ne’e nia kontribui ona ba treinamentu no formasaun ba pesoál militár Timor-Leste kona-ba operasaun manutensaun dame. Iha futuru, iha mós posibilidade atu envolve pesoál F-FDTL hamutuk ho militár Tailándia iha misaun manutensaun dame Nasoins Unidas (ONU),” dehan Jeneral Ukris Boontanondha.
Além área defeza no seguransa, kooperasaun bilateral ne’e sei estende mós ba asisténsia umanitária no apoiu ba komunidade sira. Tailándia iha sentru treinamentu espesífiku ne’ebé regularmente organiza programa formasaun kona-ba asisténsia umanitária durante tinan ida.
Enkontru ne’e mós aborda asuntu konservasaun natureza no protesaun ambiente, nu’udar parte husi esforsu hamutuk atu promove dezenvolvimentu sustentável.
Ho kooperasaun ne’e, nasaun rua hein katak aniversáriu tinan 25 relasaun diplomátika sei sai oportunidade importante atu haforsa amizade, solidariedade no parseria estratéjika, liuliu iha área defeza, seguransa, asisténsia umanitária no dezenvolvimentu sustentável.
Komentariu