Smnewstl.com – Dili, 10 Novembru 2026 – Projetu rehabilitasaun estrada ne’ebé liga Lourba Munisípiu Bobonaro, liga ba Zulo Zumalain Mumicipio Covalima avansa ba etapa prosesu aprovisionamentu iha Komisaun Nasionál Aprovisionamentu (CNA), depois Ministériu Obras Públikas (MOP) kontinua halo akompanhamentu atu aselera prosesu ne’e.
Ministru Obras Públikas Samuel Marçal, konfirma katak,prosesu aprovisionamentu ba projetu estrada refere dadaun ne’e iha CNA. Projetu ne’e konsidera importante atu hadi’a kondisaun infraestrutura rodoviária no fasilita asesu ba komunidade sira iha área Lourba no Zulo.
Samuel Marçal hateten katak,MOP kontinua halo monitorizasaun no esforsu atu aselera prosesu aprovisionamentu ne’e. Maski nune’e, nia admite katak to’o agora seidauk simu informasaun foun kona-ba progresu prosesu ne’ebé hala’o hela iha CNA.
Atrasu ka demora iha prosesu aprovisionamentu bele afeita espetativa komunidade sira ne’ebé hein atu hetan estrada ho kondisaun di’ak liu. Tanba ne’e, akompanhamentu no koordenasaun entre instituisaun relevante sira importante atu garante prosesu ne’e avansa tuir prosedimentu.
Ho implementasaun projetu ne’e, komunidade sira espera katak asesu ba transporte, movimentu ema no atividade ekonómika lokál bele sai fasil liu, no kontribui ba dezenvolvimentu infraestrutura iha Munisípiu Bobonaro.
Komentariu