SMnewstl.com Manila, Filipinas 09 Novembro 2026-Governu Filipinas liuhusi Polísia Nasionál Filipinas (PNP) prepara medida seguransa rigorozu hodi garante orden públika no dame durante realizasaun Summit ASEAN dala 49, ne’ebé sei hala’o husi loron 16 to’o 18 fulan Novembru.
Tuir Relatario ne’ebé fo sai iha TV5 News haktuir, Hodi asegura eventu internasionál importante ne’e, PNP sei mobiliza efetivu polísia na’in liu 19.000 atu hala’o operasaun seguransa, kontrolu no vijilánsia iha área sira ne’ebé sei sai sentru atividade Summit ASEAN.
Mobilizasaun efetivu seguransa ne’e hatudu kompromisu autoridade Filipinas nian atu garante delegasaun internasionál, reprezentante governu no partisipante sira bele hala’o atividade sira ho seguransa no tranquilidade.
Iha preparasaun ne’e, PNP mós hametin koordenasaun ho ajénsia aplikasaun lei seluk, inklui Forsa Armada Filipinas (AFP), atu asegura seguransa iha hotél, fatin alojamentu delegasaun no lokal importante sira seluk ne’ebé sei uza durante Summit ASEAN.
Kooperasaun entre instituisaun seguransa sira ne’e importante tebes atu asegura sistema vijilánsia, prevensaun no resposta ba situasaun emerjénsia durante eventu ne’e.
Iha medida administrativa, autoridade Filipinas mós deklara loron 16 to’o 18 fulan Novembru nu’udar feriadu espesial la’ós servisu (Special Non-Working Holiday) iha territóriu tomak Metro Manila.
Deklarasaun feriadu ne’e parte ida husi medida preparatória atu fasilita implementasaun seguransa no jestaun movimentu públiku durante Summit ASEAN dala 49.
Summit ASEAN sai nu’udar eventu diplomátiku importante ne’ebé hametin kooperasaun entre nasaun membru ASEAN, liuliu iha área polítika, ekonomia, seguransa no dezenvolvimentu rejionál.
Ho preparasaun seguransa ne’ebé envolve efetivu polísia na’in liu 19.000 no koordenasaun ho Forsa Armada Filipinas, autoridade Filipinas buka asegura Summit ASEAN 49 bele hala’o ho susesu, orden no seguransa.
Komentariu