Smnewstl.com | KUPANG, 7 Novembru 2026 – Desportu la’ós de’it kona-ba kompetisaun no buka vitória, maibé mós sai ponte ida atu hametin amizade, promove dame no aproxima povu sira.
Vizaun ida-ne’e mak sai mensajen prinsipál hosi Primeiru-Ministru (PM) Timor-Leste, Kay Rala Xanana Gusmão, bainhira asiste kompetisaun Boxing Lazarus Laiskodat Memorial Cup III 2026, iha Provínisa Nusa Tenggara Timur (NTT), Indonézia.
Iha oportunidade ne’e, PM Xanana promete katak sei lori boxista Timoroan sira atu partisipa iha edisaun tuirmai, Lazarus Laiskodat Memorial Cup 2027, nu’udar esforsu ida atu hametin relasaun amizade no kooperasaun desportiva entre Timor-Leste no Indonézia.
Promesa ne’e Xanana hato’o bainhira marka prezensa diretamente iha kompetisaun finál ne’ebé hala’o iha Estádiu Lazarus Laiskodat, Desa Otan, Illa Semau, Kabupaten Kupang, Provínisa NTT.
Iha momentu finál kompetisaun, PM Xanana mós hetan oportunidade atu entrega prémiu ba atleta sira ne’ebé konsege hetan vitória. Nia hato’o apresiasaun ba komisaun organizadora ne’ebé konsege hala’o eventu ho susesu, no ba atleta hotu-hotu ne’ebé hatudu kapasidade, disiplina no espíritu kompetitivu durante kompetisaun.
Ba Xanana, eventu desportivu hanesan ne’e iha signifikadu boot liu duké disputa medalha ka troféu, tanba desportu iha kapasidade atu harii dame iha ema ida-idak nia laran, hametin unidade iha sosiedade no promove kultura dame iha rejiaun.
“Ha’u promete katak tinan oin boxista hosi Timor-Leste sei partisipa iha kompetisaun ne’e. Ha’u admira tanba atleta barak mak partisipa iha eventu ida-ne’e, mai hosi provínsia oioin iha Indonézia. Tenke nune’e duni atu bele haburas dame iha rejiaun.
Ohin loron mundu buras ho funu, iha ita-nia rejiaun, liuliu ita la’ós de’it viziñu, maibé maun-alin. Ita tenke promove dame entre ita liuhosi desportu,” PM Xanana afirma.
Partisipasaun PM Xanana iha eventu ne’e nu’udar parte hosi ajenda vizita amizade ba Provínisa NTT, tuir konvite hosi eis-Governadór NTT, Viktor Bungtilu Laiskodat, ne’ebé agora nu’udar membru Parlamentu Indonézia.
Boxing Lazarus Laiskodat Memorial Cup III 2026 envolve atleta hamutuk 334, ne’ebé mai hosi Provínisa NTT no provínsia seluk iha Indonézia. Kompetisaun ne’e nu’udar plataforma atu buka, identifika no dezenvolve talentu boxista foun, liuliu entre juventude.
Aleinde ne’e, kompetisaun ne’e iha objetivu atu hadi’a kualidade treinamentu, prepara atleta potensiál sira ba kompetisaun nasionál, inklui Pekan Olahraga Nasional (PON) 2028 no 2032.
Ho promesa atu lori boxista Timoroan sira partisipa iha edisaun 2027, kompetisaun ne’e iha esperansa atu sai oportunidade foun ba atleta Timor-Leste sira atu dezenvolve kapasidade, hetan esperiénsia internasionál no hametin amizade ho atleta Indonézia.
Liu hosi ring boxing, Timor-Leste no Indonézia iha oportunidade atu hatudu katak diferensa no kompetisaun la’ós sai obstákulu ba amizade, maibé bele sai dalan ida atu harii dame, unidade no futuru ne’ebé di’ak ba povu rua ne’e.
Komentariu