Smnewstl.com — Prezidente Repúblika, José Ramos-Horta no Laureadu Nobél ba Páz, liu husi Unidade Serbisu Soliedariedade no Apoiu Sosiál, halo vizita no fó apoiu sosiál ba família rua ne’ebé nia uma hetan inçendio (ahi-han), iha Aldeia Malaria, Suku Maulau, Postu Maubisse, Munisipiu Ainaro.
Durante vizita ne’e, Assesór Quintiliano Moniz ho Ekipa hamutuk ho Autoridade Lokál sira, entrega ajuda emergencia hanesan: Fós, Roupa, manu-tolun, Mina, Sabaun, Rinço, osan cash emerjensia nian no mos nesesidade Bázika seluk tan, hodi responde ba situasaun difisil ne’ebé família vítima sira enfrenta. Uma kain rua ne’e susar totál tan inçendio (ahi-han) mak akontese iha loron balu liuba, tanba problema lilin ne’ebé sira sunu iha uma laran no haluha hu’u-mate, equantu sira seluk ba hotu to’os laran hodi ku’u kafé, hela mak avô Feto ho nia beioan ki’ik iha uma.
Liu deit loron balun Prezidente Ramos-Horta akompaña mos iha media sosiál hodi orienta ekipa Prezidénsia Repúblika liu husi Unidade Serbisu Apoiu Sosiál tu’un direta ba fatin akontesimentu.
Ajuda husi Prezidénsia Repúblika ne’e inklui fó apoiu urjensia ba kestaun moris lor-loron nian no assistência imediata ba rekonstrusaun uma maibé ne’e ekipa sei koopera ho instituisaun Relevante sira hodi toma atensaun. Unidade Serbisu Soliedariedade ho ekipa sei kontinua monitoriza situasaun ne’e hodi koordena ho autoridade lokál sira atu halo asisténsia di’ak liu tan ba família ne’e.
Líder komunitáriu no família sira hatudu agradesimentu bo’ot ba Prezidente Horta no nia ekipa, tanba prezensa direta no prontidaun ba fó solidariedade iha momentu krítiku. (*/Smnews)
Komentariu