SMnewstl.com | DILI 15 Abril 2026 — Governu Timor-Leste liu husi Ministériu Finansas ofisialmente asina akordu koperasaun ho Korea International Cooperation Agency (KOICA) hodi apoiu programa importante rua: fortalese merenda eskolar no implementa reflorestasaun sustentável iha rai-laran.
Ministra Finansas, Santina José Rodrigues F. Viegas Cardoso, hateten katak apoiu ne’e ho total orsamentu US$13 miliaun, ne’ebé US$7 miliaun ba setor edukasaun no US$6 miliaun ba reflorestasaun no agrikultura.
“Akordu ida-ne’e importante tebes tanba bele ajuda hadia nutrisaun labarik sira iha eskola, no ao mesmo tempu proteje no restaura ita nia rai no floresta,” dehan Ministra.
Iha parte Seluk Ministra Edukasaun, Dulce de Jesus Soares, apresia apoiu husi KOICA no World Food Programme (WFP), ne’ebé kontinua suporta programa merenda eskolar iha munisípiu sira.
Governante ne’e subliña, programa ne’e sei fó apoiu ba eskola 35, inklui distribuisaun ai-han fortifikadu ho vitamina, formasaun ba merendeira sira, no sosa ekipamentu nesesáriu ba preparasaun merenda.
“Programa ida-ne’e sei ajuda tebes labarik sira atu hetan nutrisaun di’ak liu. Iha fatin barak seidauk iha dapur ne’ebé apropriadu, no apoiu ida-ne’e sei ajuda harii dapur merenda eskolar,” hateten Ministra Dulce.
Iha setor ambientál, Ministru Agrikultura, Pekuária, Peskas no Florestas, Marcos da Cruz, hateten programa reflorestasaun sei implementa iha Munisípiu Baucau no Manatuto durante tinan 7, hahu husi 2026.
Nia esplika Iha Baucau, programa sei foka iha Suku Kaibada. Iha Manatuto, sei estabelese sentru viveiru permanente ba produs ai-oan, sentru formasaun florestal, no halo atividade reflorestasaun iha área Obratu no Mahabat.
Total área ne’ebé sei kobre iha programa ne’e to’o 250 hektare entre munisípiu rua ne’e.
Ministru Marcos mos subliña katak Korea laos dala uluk ajuda Timor-Leste, tanba uluk mos fó ona apoiu liu husi programa AFOCO ba reflorestasaun.
Serimónia asinatura akordu ne’e realiza iha Ministériu Finansas, Dili, ho partisipasaun husi membru Governu, Prezidenti Autoridade Munisípiu sira, Diretora KOICA iha Timor-Leste, no reprezentante husi WFP no parseiru relevante sira seluk.
Komandante Jerál kongratula ekipamentu dsik ba sira-nia servisu profisionál ne’ebé konsege deteta no hapara sirkulasaun osan falsu ho montante boot, no fó orientasaun atu kontinua buka no identifika fatin seluk ne’ebé bele liga ho kazu ida ne’e. (/SMnews)
Komentariu