SMnewstl.com | Baucau, 05 Novembru 2026 – Uma-hela fatin rua no dapur ida hetan estragus totál tanba inséndiu ne’ebé akontese iha Suku Alaua Kraik, Postu Administrativu Baguia, Munisípiu Baucau.
Inséndiu ne’e afeta família na’in rua, ne’ebé mak pertense ba Bernardo Rodrigues, tinan 70, no Feliciano Rodrigues, tinan 81.
Insendio ne’e akontese tanba deskonfia kauza husi sirkuitu iha instalasaun eletrisidade.
Tuir relatoriu husi Autoridade Protesaun Sivíl (APC) Munisípiu Baucau relata katak, insidente ne’e la rezulta vítima kanek ka mate, maibé estragus total sasan uma laran no material sira seluk.
Hafoin simu informasaun kona-ba inséndiu, ekipa APC liuhusi Gabinete DNGRD no Gabinete Rekuperasaun bá diretamente iha fatin atu halo levantamentu ba estragu ne’ebé akontese no identifika nesesidade vítima sira.
Atu responde ba situasaun emerjénsia ne’e, APC mós entrega apoiu pakote emerjénsia, inklui ai-han no nesesidade bázika seluk ba família afetadu sira.
Agora vítima sira hela temporariamente iha uma família no vizinu sira, enkuantu hein solusaun ba situasaun ne’ebé sira enfrenta. Entre vítima na’in rua ne’e, Bernardo Rodrigues mak ema ho defisiénsia (EHD).
Akontesimentu ne’e hatudu importánsia atu komunidade fó atensaun ba kondisaun instalasaun eletrisidade iha uma, hodi prevene risku kurto sirkuitu no inséndiu ne’ebé bele ameasa vida no propriedade.
Komentariu