DILI, 21 Abríl 2026—Kay Rala Xanana Gusmão sente lakon Ministru Ensinu Superiór, Siénsia no Kultura (MESSK), José Honório da Costa Pereira Jerónimo ne’ebé servisu ho dedikasaun tomak iha IX Governu Konstitusionál.
Primeiru-Ministru espresa sentimentu triste ne’e liu-hosi mensajen eskrita bainhira vizita mate-isin José Honório da Costa Pereira Jerónimo iha mortuáriu Hospitál Nasionál Guido Valadares, Dili, tersa (21/04/2026).
Prezensa Xefe Governu nian ne’e mós hodi hato’o sentidu kondolénsia no enkoraza família atu forsa perante situasaun triste ne’e.
José Honório da Costa Pereira Jerónimo moris iha Bazartete, munisípiu Liquiçá iha 15 fulan-fevereiru 1973.
Tinan 2001, gradua iha Estudu Dezenvolvimentu hosi Institutu Teknolojia no Siénsia Mandala Indonézia.
Hetan títulu Mestradu kona-bá Estudu Dezenvolvimentu iha Universidade Kristen Satya Wacana, Salatiga, Indonézia, iha 2010.
Tinan 2001 nu’udár dosente iha Fakuldade Ekonomia, Departamentu Estudu Ekonomia no Dezenvolvimentu, iha Universidade Nasionál Timor-Leste (UNTL).
Assume kargu xefia oin-oin iha UNTL mak hanesan, Xefe Departamentu Ekonomia no Estudu Dezenvolvimentu (2004-2006), Dekanu Fakuldade Ekonomia (2006-2008), Vise-Dekanu Asuntu Estudante iha Fakuldade Ekonomia no Jestaun (2011-2013), Reitór Administrasaun no Finansas (2016-2020) no Pro-Reitór Inspesaun, Auditoria no Kontrolu Kualidade (2021-2023).
Nu’udar membru Konsellu Jerál UNTL hosi 2015 to’o 2016. Hala’o kna’ar nu’udár Adidu Komérsiu iha Embaixada Repúblika Demokrátika Timor-Leste iha Jakarta, Indonézia (2013-2015).
Iha tinan 1994, sai hanesan membru organizasaun estudante Rezisténsia Nasionál Estudante Timor-Leste (RENETIL) ne’ebé harii iha tinan 1988 hosi estudante timoroan sira iha Indonézia ho objetivu atu luta bá independénsia Timor-Leste nian.
Iha loron 1 fulan-jullu tinan 2023, simu pose nu’udár Ministru Ensinu Superiór, Siénsia no Kultura iha IX Governu Konstitusionál, hodi sai responsável bá konsesaun, ezekusaun, koordenasaun no avaliasaun polítika nian iha área sira ensinu superiór no kualifikasaun nian, no mós área siénsia no teknolojia. Universidade Nasionál Timor-Leste, Institutu Politékniku Betano, Institutu Nasionál Siénsia no Teknolojia, no Ajénsia Nasionál bá Avaliasaun no Akreditasaun Akadémika, I.P., iha ninia autoridade nia okos. (/SMnews)
Komentariu