SMnewstl.com | Vikeke, 26 Abril 2026 – Komunidade iha área Beasu, Munisípiu Viqueque, kontinua hasoru difikuldade boot relasiona ho kondisaun estrada no ponte ne’ebé la adekuadu, liu-liu iha tempu udan.
Tuir informasaun ne’ebé SMnews asesu husi utilizadór sosiál média, udan bo’ot halo mota sae no taka dalan asesu husi Beasu ba Postu Administrativu Watulari no Watucarabau.
Situasaun ne’e akontese tanba seidauk iha ponte permanente, nune’e sidadaun no transporte sira labele atravessa mota bainhira bee sae.
Kondisaun ne’e obriga komunidade atu hein oras naruk to’o bee mota tun fali, ne’ebé afeta diretamente mobilidade populasaun, liu-liu transporte merkadoria no asesu ba merkadu.
La’ós deit transporte, estudante sira no komunidade ne’ebé presiza halo atividade loron-loron mos hetan impaktu husi problema ne’e, tanba dalan ne’ebé la seguru no difisil atu liu.
Ho situasaun ne’e, komunidade Beasu husu atensaun imediata husi Governu, liu-liu Ministériu Obras Públikas (MOP), atu hadi’a infraestrutura básica, inklui konstrusaun ponte permanente hodi garante asesu ne’ebé seguru, fasil no kontinuu ba populasaun, partikularmente iha tempu udan.(/SMnews)
Komentariu