SMnewstl.com|| Díli, 14 Agostu 2026 — Ministra Edukasaun (ME), Dulse de Jesus, hateten katak Programa Hakbit Joventude no Dezenvolvimentu kontinua fó oportunidade ba estudante sira atu dezenvolve kapasidade, kreatividade, lideransa no espírito voluntarismu liuhusi atividade edukativu, desportiva no sosial.
Programa ne’e hala’o liuhusi kooperasaun entre Ministériu Edukasaun, Sala Leitura Xanana Reading Room no eskola sira, hodi fasilita estudante sira atu partisipa iha atividade oioin ne’ebé fó oportunidade ba sira atu aprende no kontribui ba komunidade.
Ministra Dulse de Jesus hatudu nia kontente ho rezultadu implementasaun programa ne’e, tanba durante fulan hitu, estudante sira konsege simu premiu dala rua, nu’udar forma apresiasaun ba sira-nia partisipasaun, kreatividade no kontribuisaun.
Governante ne’e esplika katak programa ne’e la’ós deit fó oportunidade ba estudante ensinu sekundáriu, maibé mós envolve estudante ensinu superior, inklui universidade privadu no públiku, atu partisipa hamutuk iha atividade voluntáriu.
“Premiu ne’e la’ós deit tanba sira partisipa, maibé mós tanba sira hatudu kreatividade, inisiativa no espírito voluntarismu,” dehan Ministra Edukasaun.
Ministra Dulse de Jesus fiar katak partisipasaun jovem sira iha atividade sosial, edukativu no ambiental bele sai baze importante ba dezenvolvimentu juventude no kontribui positivamente ba komunidade iha futuru.
Iha parte seluk, Samantha Ashmore, Reprezentante husi The Duke of Edinburgh’s International Award Australia, hateten katak programa dezenvolvimentu juventude ne’e foka ba jovem sira ho idade entre 8 to’o 25 tinan.
Programa ne’e inklui atividade sira ne’ebé ajuda dezenvolve komunikasaun no relasaun entre jovem no komunidade, atividade desportiva hanesan futebol no boxing, no atividade sosial ne’ebé liga ho nesesidade no realidade iha sosiedade.
Samantha hateten katak liuhusi atividade hirak ne’e, jovem sira bele aprende responsabilidade, servisu hamutuk, lideransa, kreatividade no kontribuisaun voluntáriu ba komunidade.
Programa Hakbit Joventude no Dezenvolvimentu espera kontinua fó espasu ba jovem Timor-Leste atu dezenvolve sira-nia kapasidade, hasa’e espírito voluntarismu no sai parte ativu iha prosesu dezenvolvimentu sosiedade.(Smnews)
Komentariu