Smnewstl.com |Dili, 13 Novembru 2026 – Komisaun Anti Korrupsaun (CAC) detéin diretor ida no konseleiru ida durante 72 oras, tanba suspeita uza sala viatura no motorista Estadu nian atu tula membru família, inklui oan, ba eskola privada iha área Balide, Dili.
Haktuir husi Pajina Ofisiál Comissão Anti Corupcão katak, Operasaun ne’e hala’o iha loron 10 Novembru 2026, lidera husi Diretór Investigasaun Kriminál CAC, José de Araújo Verdial, liuhusi ekipa investigadór ne’ebé halo fiskalizasaun no aborda viatura ofisiál sira ne’ebé suspeita uza ba finalidade la’ós públika.
Iha operasaun ne’e, CAC identifika motorista sira, diretor no konseleiru ne’ebé envolve iha utilizasaun viatura Estadu nian. Sira hotu lori ba edifísiu CAC iha Farol, Dili, atu halo prosesu identifikasaun no halibur esplikasaun preliminár.
Hafoin halo verifikasaun, CAC deside liberta motorista sira tanba apuramentu hatudu katak sira kumpre de’it ordem no instrusaun husi superior hierárkiku, la iha indikasaun katak sira hetan benefísiu ka interese pesoál diretamente husi utilizasaun viatura hirak ne’e.
Maibé, CAC konsidera katak iha indísiu forte kona-ba desvia finalidade no utilizasaun ilegál rekursu públiku husi titular kargu ka dirijente sira ne’ebé fó ordem ka autoriza utilizasaun viatura Estadu nian ba interese privadu no familiar.
Diretór Investigasaun Kriminál CAC, José de Araújo Verdial, esplika katak viatura Estadu nian fornese ba titular kargu atu kumpre atividade ofisiál, la’ós atu utiliza ba nesesidade pesoál.
“Estadu fó transporte ba kargu xefia sira atu utiliza ba interese Estadu nian. Maibé, iha realidade, ekipa fiskalizasaun deskobre katak ajente Estadu nian utiliza kareta Estadu tula sira-nia oan ba eskola. Ida-ne’e ba finalidade privadu,” nia afirma.
CAC konsidera katak hahalok ne’e bele viola artigu 17 husi Dekretu-Lei N.º 8/2022, loron 9 Novembru, kona-ba Regulamentu Rejime Jurídiku Utilizasaun Viatura Estadu nian, ne’ebé bandu utilizasaun viatura ofisiál ba deslokasaun partikular ka familiar ne’ebé la iha relasaun ho finalidade públika.
Tanba ne’e, CAC submete expediente prosesuál kompletu ba Ministériu Públiku (MP), hodi husu atu tau dokumentu sira iha prosesu no promove dilijénsia investigasaun adisionál kona-ba responsabilidade penál husi titular kargu sira ne’ebé fó ordem ka autoriza utilizasaun rekursu Estadu ba finalidade privadu.
Investigasaun ne’e mos foka ba posibilidade krime pekulatu uzu, ne’ebé CAC refere ba artigu 298 Kódigu Penál, no infrasaun seluk ne’ebé iha ligasaun ho jestaun patrimóniu públiku.
CAC informa katak iha operasaun ne’e, investigadór sira mos kaptura no halo prosesu identifikasaun ba motorista na’in tolu seluk tanba aktu ne’ebé hanesan. Maibé, depoisde identifikasaun no detensaun durante oras balun, sira hetan libertasaun no sei kontinua tuir prosesu normál.
Enkuantu ne’e, diretor no konseleiru ne’ebé suspeita envolve diretamente iha utilizasaun viatura Estadu ba finalidade privadu, CAC deside aplika medida detensaun durante 72 oras, ho fundamentu katak hahalok ne’ebé suspeita komete prienxe elementu krime pekulatu uzu, tuir artigu 83 Lei N.º 7/2020 kona-ba Medidas Prevensaun no Kombate Korrupsaun.
CAC mós informa katak iha loron 13 Novembru, investigadór sira prepara aktu prosesuál atu entrega suspeitu na’in rua ne’e ba Ministériu Públiku, hodi kontinua prosesu primeiru interrogatóriu iha Tribunál Judisiál Primeira Instánsia Dili.
Alegasaun krime sira ne’e sei kontinua iha prosesu investigasaun no desizaun kona-ba responsabilidade penál sei depende ba prosesu judisiál.
Komentariu