SMnewstl.com | Manila, Filipina, 13 Novembru 2026 – Governu Filipina loke ofisialmente Sentru Mídia Internasionál (International Media Center – IMC), iha World Trade Center Metro Manila, Pasay City, iha Sesta-feira (13/11), hodi fasilita no apoia jornalista nasionál no internasionál sira ne’ebé mai halo kobertura ba Simiéra ASEAN-49 no enkontru relasionadu sira.
Abertura sentru mídia ne’e lidera husi Sekretáriu Interinu Gabinete Komunikasaun Prezidensiál (PCO) Filipina, Lino Cayetano, hamutuk ho Sekretária Turizmu, Dita Angara-Mathay, Diretora-Jerál ba Operasaun Konsellu Nasionál Organizadór ASEAN 2026, Ma. Hellen B. De La Vega, no reprezentante mídia nasionál no internasionál sira.
Iha serimónia abertura ne’e, Lino Cayetano afirma katak sentru mídia ne’e harii espesialmente atu sai fatin servisu ba jornalista sira, hodi asegura katak sira bele hala’o knaar profisionál ho di’ak, konfortavel no livre.
Nia esplika katak objetivu harii sentru ne’e la’ós de’it atu fasilita knaar jornalista sira durante Simiéra ASEAN, maibé mós atu sai hanesan janela ba mundu atu koñese Filipina nia kultura, produtu, indústria no riku-soin nasionál sira.
“Fatin ida-ne’e harii ba imi hotu, atu imi bele hala’o imi-nia knaar ho di’ak, ho profisionalizmu no ho liberdade. Maibé, ami harii fatin ida-ne’e mós atu sai hanesan janela ida ne’ebé bele hatudu ba mundu nasaun Filipina ne’ebé furak no iha riku-soin barak,” dehan Lino Cayetano.
Iha okaziaun ne’e, nia mós konvida jornalista nasionál no internasionál sira atu aproveita tempu livre durante atividade kobertura nian, hodi vizita pavilhaun sira ne’ebé prepara iha sentru mídia, atu haree diretamente kultura, destinasaun turístika, produtu lokál no setór indústria Filipina nian.
“Ami konvida imi atu vizita fatin furak sira iha Filipina liuhusi pavilhaun sira ne’ebé ami prepara. Imi bele haree produtu lokál sira, setór industriál sira, no mós hetan oportunidade atu koñese riku-soin espesiál no furak liu hotu ne’ebé ami iha, katak povu Filipinu rasik,” nia hatutan.
Liu husi deklarasaun ne’e, Cayetano reafirma kompromisu PCO no Governu Filipina atu fó apoiu ba jornalista sira, hodi asegura katak sira bele hala’o knaar kobertura ho di’ak no hetan asesu ba fasilidade no apoiu ne’ebé presiza.
“Ami hotu iha Gabinete Komunikasaun Prezidensiál no Governu prontu atu servisu no fó apoiu ba imi. Ami sei ajuda imi atu hala’o imi-nia knaar jornalístiku,” nia afirma.
Nia mós manifesta esperansa katak enkontru entre líder sira husi nasaun oioin iha Simiéra ASEAN bele lori solusaun ba dezafiu komún sira no kontribui ba harii futuru ne’ebé di’ak liu ba povu sira iha rejiaun.
Abertura Sentru Mídia Internasionál ne’e sai parte importante husi preparasaun Filipina nu’udar nasaun anfitriaun ba Simiéra ASEAN-49, ne’ebé sei hala’o iha Manila, husi 15 to’o 17 Novembru 2026.
Liuhusi fasilidade ne’e, jornalista nasionál no internasionál sira sei iha oportunidade atu hala’o servisu kobertura, asesu ba informasaun no akompaña diretamente dezenvolvimentu atividade sira durante enkontru rejionál ne’e.
Komentariu