Smnewstl.com | Jakarta, 13 Novembru 2026 – Prezidente Repúblika Indonézia, Prabowo Subianto, simu ona karta deklarasaun renúnsia husi Gibran Rakabuming Raka, husi kargu Vise-Prezidente Repúblika Indonézia, no hato’o agradese ba nia servisu no dedikasaun durante tinan rua nia servisu hamutuk iha governu.
Prabowo hato’o informasaun ne’e depoisde Gibran hasoru diretamente nia iha Palásiu Merdeka, Jakarta, iha tuku 10:15 oras Indonézia Osidentál (WIB), atu entrega karta deklarasaun kona-ba nia desizaun atu renúnsia husi kargu Vise-Prezidente.
Depoisde enkontru ho Prezidente, Gibran kontinua entrega karta renúnsia ne’e ba lideransa Majelis Permusyawaratan Rakyat (MPR) Repúblika Indonézia, hodi tuir prosesu institusionál ne’ebé aplika.
Iha deklarasaun ba imprensa, Prabowo afirma katak nia simu desizaun Gibran nian ho sentimentu triste, maibé respeita no suporta desizaun ne’e. Nia konsidera katak Gibran foti desizaun ho responsabilidade no konsidera interese nasaun no Estadu.
Prabowo mós hato’o apresiasaun ba kontribuisaun Gibran durante tinan rua servisu hamutuk iha governu. Tuir nia, Gibran iha knaar importante atu monitoriza diretamente implementasaun programa governu nian iha rejiaun sira, inklui área remota.
Tuir dadus ne’ebé Prabowo aprezenta, durante períodu ne’e, Gibran vizita ona provínsia hamutuk 35, distritu no sidade 149, no halo monitorizasaun direta ba projetu governu hamutuk 303.
Prabowo hateten katak,kontribuisaun no dedikasaun Gibran durante períodu servisu hamutuk ne’e merese apresiasaun, liuliu iha esforsu atu haree diretamente progresu programa governu nian iha komunidade sira.
Iha ikus, Prabowo konvida povu no elementu hotu-hotu iha Indonézia atu tau interese nasaun no Estadu nian iha leten, kontinua hametin unidade nasional, mantein dame no asegura estabilidade nasional.
Fontes:ANTARA
Komentariu