SMnewstl.com | Manatuto 15 Novembru 2026-Iha uma ki’ik ne’ebé kondisaun físika la adekuadu no ameasa seguransa ba sira ne’ebé hela iha laran, inan faluk Jacinta de Araújo kontinua enfrenta realidade moris ne’ebé todan. Hamutuk ho nia bei-oan feto na’in rua.
Inan faluk Jacinta luta loroloron atu mantein moris no asegura katak nia bei-oan sira bele kontinua ba eskola, maski kondisaun ekonomia no uma-larn ne’ebé nia iha la fó garantia ba moris ne’ebé seguru.
Inan faluk ne’e hela iha Aldeia Lauwadu, Suku Funar, Postu Administrativu Laclubar, Munisípiu Manatuto. Ba Jacinta, uma ne’ebé tenke sai fatin protesaun no deskansu ba família, agora sai fonte preokupasaun, tanba kondisaun konstrusaun ne’ebé la seguru, liuliu bainhira tempu udan.
Maski hasoru difikuldade ne’e, Jacinta la hakotu nia esforsu. Nia kontinua tau matan ba nia bei-oan feto na’in rua, ho esperansa atu sira bele hetan futuru ne’ebé di’ak liu liuhusi edukasaun. Iha realidade moris ne’ebé limitadu, nia responsabilidade nu’udar inan no avo obriga nia atu kontinua hamriik, maski dalan ne’ebé nia liu difisil.
Situasaun ne’ebé Jacinta enfrenta ne’e to’o ba Prezidente Repúblika, José Ramos-Horta, liuhusi informasaun ne’ebé Media Komunitária Laclubar hato’o. Informasaun ne’e sai hanesan dalan ida atu lori realidade moris família vulnerável ne’e ba atensaun entidade sira.
Hafoin simu informasaun, Prezidente Repúblika José Ramos-Horta haruka kedas ekipa Gabinete Servisu Apoiu Sosiedade Sivil (SSAS), ne’ebé lidera husi Koordenadora Tereza dos Santos Ximenes, atu halo verifikasaun direta iha terenu.
Kordenadora Tereza dos Santos Ximenes esplika katak ekipa Prezidensiál halo ona koordenasaun ho autoridade lokál no entrega apoiu urjente ba Jacinta, inklui ai-han atu ajuda responde ba nesesidade loroloron.
Ba Jacinta, apoiu ne’e la’ós de’it ai-han ne’ebé nia simu, maibé mós sinal ida katak sofrimentu no difikuldade ne’ebé nia enfrenta hetan ona atensaun husi parte relevante sira.
Koordenadora SSAS hatutan katak ekipa sei kontinua koordena ho autoridade lokál atu prepara proposta ba tinan oin, hodi buka possibilidade apoiu ba konstrusaun uma foun, tanba uma ne’ebé Jacinta hela agora la adekuadu ba nia no nia bei-oan sira.
Xefe Suku Funar, Gaspar Pereira, hato’o agradese ba Prezidente Repúblika tanba fó atensaun ba situasaun inan faluk ne’e. Nia konsidera apoiu ai-han importante atu ajuda responde ba nesesidade família, maibé husu mós atu konsidera konstrusaun uma foun, tanba kondisaun uma agora grave no la seguru, liuliu bainhira udan boot.
Nia mós informa katak autoridade suku kontinua halo koordenasaun ho Servisu Sosiál Munisípiu Manatuto, no iha tinan ne’e Jacinta hetan ona apoiu liuhusi programa Hatutan Dapur dala rua.
Hp oportunidade ne’e Jacinta de Araújo, ho sentimentu agradese, ba Prezidente Repúblika José Ramos-Horta no ekipa ne’ebé mai vizita no fó apoiu ba nia.
Nia hateten katak, maski la iha rikuza atu selu fila fali ajuda ne’ebé nia simu, nia sei kontinua hasa’e orasaun ba Prezidente Repúblika no membru ekipa sira ne’ebé hanoin no fó atensaun ba nia família.
Ba Jacinta, apoiu ne’e sai hanesan esperansa ida iha tempu ne’ebé nia no nia bei-oan sira kontinua enfrenta difikuldade moris.
Maibé, iha realidade, nesesidade família ne’e seidauk remata. Ai-han bele ajuda sustenta moris loroloron, maibé uma ne’ebé seguru mak nafatin sai nesesidade importante atu proteje Jacinta no nia bei-oan sira husi risku, liuliu durante tempu udan.
Istória moris inan faluk Jacinta ne’e la’ós de’it kona-ba família ida ne’ebé enfrenta kiak, maibé mós kona-ba luta loroloron hodi sustenta família no hakbiit esperansa ba jerasaun tuirmai. Iha uma ne’ebé la fó seguransa, nia nafatin hamriik no tau matan ba nia bei-oan sira, ho hakarak ida de’it: atu sira bele moris no hetan futuru ne’ebé di’ak liu.












Komentariu