Smnewstl.com(LAUTÉM)—Primeiru-Ministru (PM), Kay Rala Xanana Gusmão hamutuk ho Ministru Obras Públikas (MOP), Samuel Marçal hala’o sosializasaun bá projetu konstrusaun estrada bá populasaun afetadu sira iha salaun GOR Lospalos-Vila, munisípiu Lautém, sábadu (01/03/2025).
Mega projetu ne’ebé tinan ne’e MOP implementa iha munisípiu Lautém hamutuk tolu mak hanesan estrada hosi Postu Administrativu Lautém bá Lospalos-Vila hamutuk kilómetru 28 ho totál orsamentu millaun $22, Estrada hosi Postu Administrativu Lautém bá Suku Com hamutuk Kilómetru 20 ho orsamentu millaun $14 no Projetu Bee Moos ho orsamentu millaun $17 ne’ebé sei fornese bá benefisiáriu uma-ka’in 3.400.
Primeiru-Ministru, Kay Rala Xanana Gusmão iha intervensaun espresa sentimentu emosionál katak, nia iha relasaun espesiál ho Lospalos, tanba ne’e husu populasaun atu fó apoiu totál bá programa Governu nian hodi implementa lalais projetu boot tolu ne’e, nune’e populasaun bele asesu bá estrada no Bee Moos.
Kay Rala Xanana Gusmão observa katak, problema prinsipál populasaun nian maka infraestrutura bázika hanesan estrada, tanba ne’e maski fazeadamente maibé IX Governu Konstitusionál prioritiza projetu konstrusaun estrada iha tinan ida-ne’e.
Líder nasionál ne’e dehan, kualkér Governu tenke tau prioridade bá dezenvolvimentu tanba ukun-an ne’e povu mak sosa ho ruin no ran, tanis, halerik, terus no mate.
“Husu populasaun munisípiu Lautém tomak atu kolabora ho Governu hodi implementa lalais projetu estrada ne’e no labele ih aimpedimentu ruma,” PM Xanana husu.
Apela mós bá kompañia sira ne’ebé kaer obra tolu ne’e tenke servisu ho kualidade no responsabilidade tanba osan ne’ebé utiliza ne’e osan povu nian.
Iha fatin hanesan, Ministru Obras Públikas (MOP), Samuel Marçal hateten, molok implementa projetu tolu ne’e Governu iha devér atu halo sosializasaun, nune’e mós Governu hakarak rona hosi komunidade afetadu sira maibé buat ne’ebé importante liu maka tenke kolabora atu nune’e projetu ida-ne’e bele realiza lalais.
“Favór labele halo impedimentu no espera katak, povu munisípiu Lautém sei sai ezemplu ida ne’ebé di’ak liu bá munisípiu sira seluk. Ita hein katak iha fulan maiu tinan ne’e sei konvida Primeiru-Ministru mai hamriik iha povu Lautém nia-oin hodi halo lansamentu bá konstrusaun estrada ne’e,” Ministru Samuel Marçal hateten.
Nune’e mós Prezidente Autoridade Munisipál Lautém, Mélio de Jesus lori povu munisípiu ne’e nia naran deklara prontu atu simu dezenvolvimentu tanba tempu naruk nia laran povu Lautém terus bá estrada.
“Husu komunidade atu rona didi’ak esplikasaun ne’ebé hato’o hosi Ministru Obras Públikas no fila bá uma hatutan bá komunidade ne’ebé la marka prezensa iha sosializasaun ida-ne’e, nune’e labele hamosu dezintendimentu bá prosesu konstrusaun estrada ne’e,” Mélio de Jesus hateten.
Governadór Banku Sentrál Timor-Leste (BCTL), Helder Lopes hanesan Lospalos-oan apela bá komunidade atu koopera tanba tinan ida-ne’e Lospalos sai espesiál iha ne’ebé Governu oferese projetu boot tolu kedan no ida-ne’e la fásil tanba iha munisípiu barak mak seidauk hetan oportunidade hanesa ne’e.
“Agradese bá Primeiru-Ministru tanba iha tinan ida-ne’e oferese projetu boot tolu ne’e, no hein katak bainhira implementa bele korre ona sofrimentu ne’ebé tinan barak povu ne’e enfreta,” Helder Lopes hateten.
Durante sesaun husu no hatan, autoridade lokál no komunidade afetadu sira deklara prontu atu koopera ho Governu no prontu atu simu dezenvolvimentu maibé husu mós bá Governu atu bele hanoin netik komunidade bainhira afeta bá uma no kintál.
Partisipa iha sosializasaun ne’e maka Ministru Justisa, Sérgio da Costa Hornai, Governadór Banku Sentrál Timor-Leste (BCTL), Helder Lopes, administradór postu sira, autoridade lokál no populasaun afetadu sira (smnews)
Komentariu