Empreza husi Malázia Aprezenta Sistema Infraestrutura Avansadu bá PM Xanana

Smnewstl.com | Dili, 21 Abril 2026– Delegasaun Kompañia Probase Manufacturing sdn, Bhd hosi Malázia aprezenta sistema infraestrutura avansadu bá Primeiru-Ministru (PM), Kay Rala Xanana Gusmão iha Palásiu Governu, tersa.

Infraestrutura avansadu refere bá sistema modernu no intelijente, integra teknolojia, IoT no automatizasaun bá efisiénsia operasionál.

Ministru Obras Públikas (MOP), Samuel Marçal ne’ebé akompaña Primeiru-Ministru esplika, delegasaun ofisiál ne’e mai-hosi Governu Malázia, aprezenta sira-nia sistema infraestrutura liu-liu kona-bá estrada atu Governu Timor-Leste (TL) haree bainhira interesadu bele implementa iha nasaun ne’e.

Iha esplikasaun hosi delegasaun Malázia nian katak, implementasaun sistema ne’e bele poupa tempu no poupa kustu materiál.

“Ami ko’alia ona, ita bele poupa to’o 40% kompara ho alkatraun. Ne’e mak Primeiru-Ministru bolu ha’u atu akompaña hodi assiste sira-nia aprezentasaun,” Ministru Samuel Marçal esplika.

Xefe Governu fó orientasaun atu ekipa ne’e bá halo aprezentasaun iha Ministériu Obras Públikas, Ministériu Planeamentu no Investimentu Estratéjiku (MPIE) no mós Ministériu Finansas (MF) hodi haree fundus.

PM Xanana mós husu ekipa ne’e atu haruka enjeñeiru sira halo uluk estudu no haree materiál sira ne’e possível implementa iha TL ka la’e, tanba espésie rai la hanesan ho rai sira ne’ebé mak sira koko ona.

Sistema ne’ebé aprezenta liu-liu bá sistema munisipál no rurál, tanba estrada nasionál kuaze konklui hotu ona maibé molok implementa presiza indika uluk fatin ida atu koko hanesan projetu pilotu ida.

Iha fatin hanesan Embaixadór Malázia iha Timor-Leste, Amarjit Sarjit Singh hateten, empreza sira ho Ministériu Obras Públikas no mós Ministériu Planeamentu no Investimentu Estratéjiku (MPIE) sei haree no halo análiza hamutuk molok implementa sistema ne’e hodi haree didi’ak  kona-bá rai iha Timor-Leste.

“Tanba ne’e mak presiza iha estudu komparativu konjunta ida, nune’e bainhira halo konstrusaun karik halo ho kualidade duni,” Amarjit Sarjit Singh hateten.

Kona-bá estabelesimentu kooperasaun hosi Malázia ho Timor-Leste iha área ne’e, Embaixadór Amarjit Sarjit Singh dehan sei rona direta hosi Primeiru-Ministru bainhira konklui ona estudu bá rai.

Diplomata ne’e konsidera kooperasaun iha área infraestrutura ne’e importante tanba TL sei sai mós uma-na’in bá Simeira ASEAN iha 2029. (/SMnews)