smnewstl.com | BOBONARO, 9 AGOSTU 2026 — Dinámika polítika iha Munisípiu Bobonaro, liuliu iha Suku Tapo Memo, Postu Administrativu Maliana Vila, hatudu movimentu foun, bainhira ema 442 ne’ebé antes ne’e sai Baze Metin FRETILIN nian deklara sira-nia desizaun atu hamutuk ho Partidu Congresso Nacional da Reconstrução de Timor-Leste (CNRT) ,hodi lori vitória ba Eleisaun Parlamentár 2028.
Afiliasaun ne’e akontese iha atividade konsolidasaun estrutura CNRT iha Suku Tapo Memo, domingo foin lalais ne’e, sai parte ida husi esforsu CNRT atu hametin estrutura partidu iha nivel baze no prepara-an ba prosesu polítiku no eleisaun sira iha futuru.
Atividade ne’e konsidera hanesan movimentu polítiku importante iha área Maliana, tanba envolve ema 442 ne’ebé antes identifika an ho FRETILIN no agora deside atu afilia ba CNRT.
Afiliante foun sira hateten katak sira-nia desizaun bazeia ba apresiasaun ba lideransa Prezidente CNRT, Kay Rala Xanana Gusmão, liuliu kona-ba nia vizaun no kompromisu ba dezenvolvimentu nasional.
Sira mós hateten katak programa no polítika dezenvolvimentu ne’ebé Governu hala’o iha territóriu nasional hatudu ona progresu, nune’e sira deside hamutuk ho estrutura CNRT, hosi nivel munisípiu to’o iha baze, atu kontribui ba fortalese partidu no apoia prosesu polítiku sira tuirmai.
Iha atividade ne’e, Sekretáriu-Jerál CNRT, Francisco Kalbuadi Lay, simu afiliante foun sira nu’udar parte husi “família boot CNRT” no konvida sira atu servisu hamutuk ho estrutura partidu iha nivel hotu-hotu.
“Afiliante sira deklara ona hamutuk ho CNRT, signifika katak sira sai ona parte hosi família boot CNRT,” hatete Francisco Kalbuadi Lay.
Nia subliña katak unidade entre lideransa, estrutura partidu no membru sira iha baze sai elementu importante atu hametin organizasaun no prepara CNRT ba Eleisaun Prezidensiál 2027, Eleisaun Kamara Munisípal 2027 no Eleisaun Parlamentár 2028.
Atividade konsolidasaun ne’e partisipa mós hosi Adjuntu Sekretáriu-Jerál CNRT, Kordenadór CNRT Munisípiu Bobonaro ho estrutura, Kordenadór CNRT Munisípiu Baucau, reprezentante CPN, Kordenadór-Jerál Klibur Profisionál, OJP, CDN, CPN, no estrutura CNRT iha Maliana Vila, Atabae, Bobonaro no Lolotoe.
Movimentu polítiku iha Tapo Memo ne’e sai parte husi esforsu CNRT atu kontinua hametin estrutura organizasionál iha nivel munisípiu no suku, enkuantu afiliasaun 442 ema ne’e aumenta dinamika polítika iha Bobonaro iha preparasaun ba eleisaun sira iha futuru.
Komentariu