Smnewstl.com – Ekipa Servisu Informasaun Sekreta (UIS) no Investigasaun Kriminal (UIC) husi Comissão Anti-Corrupcão (CAC) hamutuk ho Polisia Nasional Servisu Investigasaun Kriminal (PNSIK) lidera husi Diretor UIS Euclides Madeira Tersa-feira (25/2) ne’e bolu obrigatóriu dirijente Serviço de Registo e Verificacao Empresarial Institutu Publiku (SERVE, I.P.) nain walu (8) iha edifisiu SERVE Caicoli Dili hodi mai presta deklarasaun no tuir prosesu identifikasaun iha Edifisiu Sentral CAC Farol Dili.
Dirijente no staff SERVE, I.P. nain lima (5) ekipa Investigasaun Kriminal CAC back-up husi PNSIK bolu obrigatóriu iha dadersan no nain tolu (3) seluk iha oras loraik.
Dirijente no staff SERVE, I.P. nain walu (8) oras ne’e assume kargu no knar importante iha instituisaun estatal ne’e. Objetivu husi aksaun polisial ne’e atu Ekipa Investigasaun kriminal CAC nian halo identifikasaun no rekolla informasaun preliminaria ba sira durante oras balun nian laran iha edifisiu sentral CAC Farol tuir Lei Kodigo Prosesu Penal Artigu 53.
Komisáriu CAC, Rui Pereira dos Santos esklarese ba publiku katak ekipa UIS no UIC CAC akompanha husi PNSIK ba halo buska no bolu obrigatoriu dirijente SERVE, I.P. nian relasiona ho kazu balun ne’ebé CAC investiga hela bazeia ba keixa no informasaun balun ne’ebé CAC rasik halibur iha terenu.
“Tamba ne’e CAC ohin ba follow up ho asaun identifikasaun ba responsavel sira iha SERVE IP; labele rona deit husi publiku ho media sira maibe ita (CAC) mos presija haklean investigasaun atu hare’e verdade husi alegasaun publiku nian ne’ebé viral iha media sosial no krimi balun akontese duni ga lae?,” Komisáriu CAC Rui sublinha.
Responsavel SERVE, I.P nian sira hanesan Diretor Ezekutivu, Adjunta Diretora Ezekutiva no funsionariu relevantes sira ne’ebé iha investigador CAC nian lista hodi mai presta deklarasaun iha Diresaun Investigasaun kriminal CAC nian Farol durante horas 12 nian laran tuir Kodigo Prsesu Penal.
Dirijente nain lima ho ninian staff sira iha SERVE, I.P kolabora diak ho aksaun polisial nian ba bolu obrigatoriu sira ninian dirijente sira. Aksaun polisial ne’e bazeia ba lei Kodigu Prosesu Penal artigu 53. (*/Smnews)
Komentariu