Smnewstl.com – Treinador selesaun nasional Kuwait husi nasaun Portugal, Emilio Delgado Peixe louva ho atetude husi jogador Timor-Leste maske rezultado ikus lori nia ekipa manan ho skor 4-0.
Liu husi konferensia imprensa hafoin jogu, Emílio Delgado afirma, ekipa Timor-Leste hatudo duni jogu ida ne’ebe diak iha primeira parte nune’e defisil oituan ba sira atu hatama golu tuir espetativa.
“Hau hakarak hato’o hau nia parabéns ba Ekipa Timor-Leste ne’ebe hatudo atetude diak durante
jogu,”haktuir Emílio
Nia hatutan, Portugal ho Timor-Leste hanesan maun alin no iha relasaun emosional ne’ebe metin tebes, tamba ne’e fiar iha jogu tuir mai ekipa rua bele mos hetan resultado diak.
“Hau husi Portugal, ho Timorense, ami hanesan maun alin, tamba ne’e espera iha jogu tuir mai sira bele hetan rezultado diak,”nia espera
Husi sorin seluk, Treinador ekipa Timor-Leste, Park Suntae rekuinese, kondisaun Klima sai mos fator ida ba derota ne’ebe ekipa hetan.
“Ami preparado, maibe ami nia jogador estrela lima to’o iha ne’e mak foin treina hamutuk, tamba ne’e dala ruma seidauk bele adapta diak, maibe ami esforsu atu jogu tuir mai bele hetan rezultado diak,”nia promete.
Golu husi ekipa Kuwait oferece husi jogador Tatal Alqaisi, Salman Mohammed, Hamad Altaweel no Salman Albous.
Timor-Leste rasik laos laiha oportunidade, maibe iha duni oportunidade tolu husi jogador estrela Galy Freitas ne’ebe rua liu deit husi besi leten no ida kona besi.
Jogu tuir mai, Timor-Leste sei hasoru Iraq iha loron 9 Setembro ne’ebe manan Macau ho rezultado 13-0 no Ikus liu mak sei hasoru Macau iha loron 12. (Smnews)
Komentariu