SMNewstl.com | Venice, Itália 07 Maio 2026– Kultura no obra artística husi Timor-Leste hetan oportunidade importante atu promove iha arena internasionál liu husi Biennale Arte 2026 ne’ebé realiza iha Venice, Itália.
Delegasaun husi Timor-Leste partisipa aktivu iha eventu prestíjiadu ida ne’e ho objetivu atu promove no valoriza identidade kulturál nasional liu husi arte kontemporánea.
Deputadu Armando dos Santos, ne’ebé integra iha delegasaun, hato’o katak partisipasaun Timor-Leste nian iha Biennale Arte 2026 hanesan pasu importante hodi hakbiit diplomasia kulturál no aumenta visibilidade arte Timor-Leste nian iha nível mundial.
Nia mós enfatiza katak eventu ne’e sai hanesan espasu boot ida atu fó oportunidade ba artista Timor-Leste sira atu interaje ho rede arte internasionál no hatudu sira nia identidade kulturál.
Iha Itália, pavilion Timor-Leste hetan vizita husi delegasaun husi nasaun sira seluk. Delegasaun Timor-Leste mós aproveita oportunidade atu vizita pavilion husi Australia, Portugal no Indonesia, hodi observa no aprende kona-ba tendénsia evolusaun arte no kultura iha nivel globál.
Iha parte seluk Secretáriu Estadu Arte no Kultura Jorge Soares Cristóvão hatete katak partisipasaun Timor-Leste iha Biennale Arte 2026 hanesan momentu históru ida ne’ebé forte tebes atu hatudu identidade kulturál nasaun nian iha nível mundial.
Tuir SEAK, dehan katak eventu ne’e la’ós de’it hanesan espasu exibisaun arte, maibé mós hanesan ponte diplomátika kulturál ida atu liga Timor-Leste ho komunidade arte internasionál sira.
Partisipasaun Timor-Leste iha Biennale Arte 2026 hatudu komitmentu forte ba promosaun no valorizasaun arte no kultura nasional iha nível internasionál. Eventu ida ne’e sai hanesan plataforma importante atu hatudu identidade kulturál Timor-Leste nian no hodi haree espasu ba artista sira atu interaje ho rede arte globál.
Liu husi partisipasaun ida ne’e, Timor-Leste mós konsege hametin relasaun kulturál ho nasaun sira seluk, hodi nune’e bele fó kontribuisaun ba troca experiencia no dezenvolvimentu sektor arte kontemporánea. (/SMnews)
Komentariu