Smnewstl.com 15-12-21 (Dili) — Sinzas saudozu Jornalista Señór, Max Stahl to’o ona Timor-Leste iha tuku 11:40 otl ho aviaun Qantas husi Austrália.
Sinzas saudozu Max Stahl nian ne’e, simu direta husi Eis Komandante Ein-xefe das FALINTIL, Kay Rala Xanana Gusmão ho Premiadu Nobel da Páz, José Ramos-Horta.
Inklui simu dadoli husi lia na’in sira, baku babadok no dansa kulturál tuir tradisaun Timor-Leste, no mós simu parada militár husi FALINTIL Forsa Defeza Timor-Leste (F-FDTL).
Hafoin parada militár, Líder Nasionál, Kay Rala Xanana Gusmão ho Eis Prezidente Repúblika, José Ramos-Horta, ofisialmente entre bá governu ne’ebé reprezenta husi Ministru Prezidénsia Konsellu Ministru, Fidélis Magalhães, hamutuk ho membru sira no mós Brigadeiru Jenerál Calisto dos Santos Coliati.
Hafoin entre bá governu, Sinzas saudozu Max Stahl nian tula iha eis Prezidente Repúblika, José Ramos-Horta nia kareta, ne’ebé no hetan seguransa másimu husi F-FDTL, no Polísia.
Alem de ne’e, sai husi Aeroportu Internasionál Prezidente Nicolau Lobato, lori Sinzas Saudozu Max Stahl nian, la’o haleu sidade Dili.
Hahú husi ponte CPLP, tun fali husi Pantai-kelapa, bá Palásiu Governu tesik bá Bidau, no sa’e bá Becora, tun fali husi Becusse bá Taibessi.
Husi Taibesi, sa’e bá eis merkadu Hali Laran, tun fali husi Balide, mai Mandarin hafoin lori bá fatin deskansa iha Sentru Audiovizual Max Stahl Timor-Leste (CAMSTL) Bemfica.
Entretantu, tuir observasaun Smnewstl iha resintu Aeroportu Comoro, nakonu ho komunidade sira, veteranus, mate restu 12 Novembru, hodi hato’o sira-nia solidariedade bá Max Stahl nia kontribuisaun bá luta ukun rasik aan Timor-Leste nian.(ant)
Komentariu