Smnewstl.com 28-11-2021 (Dili) – Prezidente Repúblika (PR) Francisco Guterres Lú Olo, husu governu atu investe liután iha setór produtivu hanesan edukasaun, saúde abitasaun no seluk tan, nune’e bele kria servisu bá joven sira.
Mensajen Xefe Estadu ne’e, transmite husi Sekretária Estadu bá Igualdade no Inkluzaun SEII), Maria José Fonseca, hafoin prezide serimónia Isar Bandeira iha Komemorasaun loron proklamasaun independénsia 28 Novembru bá dala-46 ne’ebé hala’o iha resintu Administrasaun Munisípiu Dili.
Impaktu husi pandemia Covid-19 ne’e, afeta makas tebes bá ekonomia Timor-Leste nian, desde rejista kazu Covid-19 dahuluk iha loron 21 fulan Marsu tinan 2020, tanba estadu tenki foti medidas atu proteje sidadaun sira-nia saúde husi Covid-19.
“Tanba ne’e, importante tebes investe liután iha saúde, edukasaun, abitasaun, protesaun sosiál no setór ekonómiku produtivu sira liu-liu iha setór agrikultura no turízmu, tanba bele harii empregu barak,” dehan Sekretária Estadu SEII, Maria José Fonseca.
Desde Timor-Leste rejista kazu dahuluk Covid-19 iha 21 fulan Marsu 2020, estadu deside aplika estadu emerjénsia ho medidas sanitária no medidas restrisaun atu prevene peste Covid-19 labele afeta bá sidadaun sira-nia saúde.
Maibé, atu hamenus impaktu negativu bá ekonomia no rendimentu família, maka governu halo esforsu hodi atribui subsídiu bá uma-ka’in sira no seluk tan.
“Atu hamenus impaktu negativu husi família sira-nian, no hasa’e mós rendimentu bá produtór sira, governu foti desizaun fó subsídiu bá uma-ka’in no fahe cesta bázika bá ema ida-idak ho polítika sosa produtu lokál liu husi ita-nia agrikultor sira, ita-nia governu foti mós medidas oi-oin hodi apoia empreza sira,” dehan nia.
Xefe Estadu mós agradese bá empreza sira, tanba, maske hasoru situasuan difísil husi impaktu pandemia Covid-19 bá reseita empreza nian, maibé la hasai traballadór sira husi servisu.
Xefe rekuiñse ho esforsu boot tebes husi estadu tomak hodi buka ajuda nia povu iha tempu susar nia laran.
Entretantu, selebrasaun 28 Novembru tinan ida-ne’e bá dala-46 ho hela ‘Hamutuk Ita Luta no Hetan Vitória bá Ita Hotu mak Pandemia Covid-19’.(ant)
Komentariu