SMnewstl.com| Dili, 6 Novembru 2026 — Ministériu Agrikultura, Pekuária, Peskas no Florestas (MAPPF), hamutuk ho Kompañia China Civil Engineering Construction Corporation (CCECC), hala’o enkontru atu avalia progresu konstrusaun Eskema Irrigasaun Sahen, ne’ebé to’o agora atinje ona 70%.
Projetu ne’e kobre área agríkola ho luan total 718,93 hektare, ne’ebé lokaliza iha Munisípiu Manatuto no Manufahi. Objetivu prinsipál husi projetu ne’e mak hadi’a asesu ba bee-irrigasaun ba agrikultór sira, hodi fasilita atividade to’os no aumenta produsaun agríkola.
Ministru Agrikultura, Pekuária, Peskas no Florestas, Marcos “MAMETA” da Cruz, afirma katak konstrusaun Eskema Irrigasaun Sahen reprezenta investimentu importante ida ba dezenvolvimentu setór agrikultura, liuliu atu fasilita to’os-na’in sira hetan asesu ba bee-irrigasaun ho sistema ne’ebé di’ak no sustentável.
Tuir ministru, sistema irrigasaun ne’e sei permite agrikultór sira utiliza rai agríkola ho efetivu durante tempu udan no tempu bailoro. Ho nune’e, sira bele aumenta produsaun hare no hadi’a kondisaun moris família agrikultór sira iha área rurál.
Aleinde ne’e, projetu irrigasaun ne’e mós iha kontribuisaun importante ba esforsu Governu nian atu hasa’e produsaun ai-han lokál, hamenus dependénsia ba produtu importadu no hametin seguransa ai-han iha Timor-Leste.
Konstrusaun Eskema Irrigasaun Sahen ne’e hala’o husi Kompañia CCECC, ho durasaun implementasaun fulan 18. To’o agora, projetu ne’e rejista ona progresu ezekusaun 70%.
Ho konstrusaun infraestrutura irrigasaun ne’e, Governu hein katak natar ho luan 718,93 hektare iha Munisípiu Manatuto no Manufahi sei hetan benefísiu husi sistema bee-irrigasaun ne’ebé di’ak liu, hodi apoia atividade agríkola, aumenta produsaun hare no hametin seguransa ai-han iha futuru.
Komentariu