Smnewstl.com 08-09-2021 (Dili) — Clubo Futebol Boavista de Timor Leste, nebe durante ne’e harame ona liga Futebol Amadora nomos sai famozu iha adeptus bola mania sira nia matan tenki deside taka ligado ho krize financeiro ne’ebe infrenta.
Tuir komunikado ne’ebe SMNews asesu liu husi pagina official facebook Boavista de Timor haktuir, Klubu Boavista FC Timor-Leste hakarak informa officialmente ba família no adepto Boavista (Boavisteiros) sira hotu iha Timor laran tomak katak hahu iha loron 07 fulan-setembru, tinan 2021 Klubu desidi ona sei la partisipa iha Liga Futeból Timor-Leste ba tinan ida ne’e, no sei taka permanente Klubu ho rajaun finaseiru.
“Ho laran todan tebes, Klubu Boavista FC Timor-Leste hakarak hato’o agradese wain ba Jogadores, família no adepto Boavista (Boavisteiros) sira hotu ne’ebé sempre fó imi hotu nia tempu hodi apoio Klubu durante jogu lao, imi hotu nia apoio no dedikasaun fó forsa no motiva tebes Klubu atu sai kampiaun. Orgulho ho imi hotu nia prezensa, imi sempre iha Klubu nia fuan, ita sei hasoru malu fali iha tempu seluk,”haktuir Carl Yazalde J. de Fatima Gusmão Nain ba Clube.
Ba SMNews via telefone Carl Yazalde J. De Fatima Gusmao kuinesidu Cico deklara, desizaun ne’e di’ak atu proteje klube iha situasaun difísil ne’e li-liiu ho ameasa pandemia kovid-19.
Nia hatutan, razaun seluk maka Federasaun Futebol Timor-Leste (FFTL) ho Liga Futebol Timor-Leste (LFTL) laiha planu ne’ebé di’ak hodi proteje klube sira iha situasaun difísil li-liu durante pandemia Covid-19 ne’e.
“Iha públiku dehan finanseiru, mais loloos ne’e ami hirus oituan FFTL ho LFTL. Sira laiha planu diak proteje klube, entaun halo ha’u deside taka lai tinan 5, 6 ou 7 hanesan ne’e foin loke fali laiha problema, mais durante ho pandemia ne’e ita lahatene bele dura to’o 2024, di’ak liu taka lai,”nia informa.
Ba desizaun ne’e rasik, Cico komfirma prontu simu sansaun husi LFTL hodi la partisipa iha liga, maibe pronto tun fali ba joga iha 3 divizaun karik Boavista deside hakarak joga fali iha tinan lima ou nen mai.
“Jogadores sira ami selu kuaze tinan kotuk, tinan ida advance tiha ona, mais haree buat ne’e la la’o, tanba de’it parte rua ne’e la valoriza klube sira, la fó valór no la proteje klube hotu-hotu, la’ós Boavista de’it. Sé FFTL hakarak fó suspensaun tinan 3 labele partisipa iha liga, depois Boavista labele partisipa iha primeiru divizaun tenki komesa fali iha terseira divizaun mós ami prontu, mais pur-enkuantu ho situasaun ida-ne’e, Boavista lakoi tuir planu ne’ebé mak FFTL sira dehan loke,” afirma nia.
Liu tan, nia informa maske seidauk koalia ho Presidente Clubu, Premiadu Nobel da Paz, Jose Ramos Horta, maibe iha espetativa katak, Horta sei apoio desizaun ne’ebe foti.
“Prezidente Horta ha’u seidauk ko’alia ho nia, mais ha’u fi’ar desizaun ne’ebé ha’u halo mós nia simu,”tenik Cico.
Dadun ne’e, Boavista haruka ona jogadór internasionál Vaka Yoko fila ona bá nia nasaun, no tempu badak mós jogadór Brazileiru Italo Soares ho Boeteng mós sei fila bá nia nasaun orijen.
“Sempre, ami iha jogadór balun ne’ebé antes klube ejíste iha hahú husi Carsae to’o Boavista ne’e nunka hakarak bá klube seluk, sira sempre hakarak hamutuk ho Boavista, mais problema ida-ne’e de’it, estranjeiru ida ami haruka fila tiha ona semana kotuk Vakayoko, uluk iha SLB, semana-rua tan Brazileiru ida naran Italo ami sosa billete dia 7 Outubru nia bá ona,” dehan nia.
Bá jogadór Timoroan Cico Gusmão dehan, sira asina kontratu durante tinan rua ho saláriu normál, tanba kuandu klube ruma hakarak kontratu fali sira, klube refere tenki selu fali Boavista nia osan ne’ebé durante ne’e selu sira.
Antes hakotu, Na’in bá klube Boavista ne’e husu deskulpa bá adeptus hotu no fiar katak, desizaun ne’ebe foti di’ak atu proteje klube, tanba liu husi desizaun ne’e mós bele fó hanoin bá FFTL ho LFTL hodi buka solusaun bá problema refere.
Boavista rasik sai ona kapiaun ba liga iha 2018 no Super Taxa.
Entretantu Secretario Geral Federasaun Futebol Timor Leste, Nelio Isac Sarmento rekuinese simu ona karta ofisial no deklara respeita desizaun ne’ebe Klubu foti.
Federasaun respeita desizoins ne’ebe klubu foti, sira mak hatene rasik sira nia kondisoins. Maibe ba desizaun ne’e, Federasaun sente lakon klubu diak ida iha epoka sira,”tenik Nelio. (ant)
Komentariu