Smnewstl.com | Italia, Kinta 07 Maiu 2026 – Ministeriu Juventude, Desportu, Arte no Kultura (MJDAK), liu husi Sekretáriu Estadu ba Arte no Kultura (SEAK), Sua Esèlensia Jorge Soares Cristóvão, ofisialmente halo abertura ba Paviliaun Timor-Leste nian iha Biennale Venezia 2026, ho objetivu atu promove no valoriza identidade kultura nasionál liu husi expozisaun arte konteporánea internasionál.
Iha serimónia abertura ofisiál ne’e, SEAK Jorge Soares Cristóvão akompanhadu husi Prezidente Komisaun G Parlamentu Nasional, Armando dos Santos Lopes, ne’ebé responsavel ba asuntu Edukasaun, Juventude, Desportu no Kultura, Sekretáriu Komisaun G Mateus da Cruz, Embaixadora Extraordinária no Plenipotensiária Timor-Leste ba Bruxelas-Béljika, Maria Lourdes Martins de Souza Bessa, no Embaixadora Timor-Leste ba Santa Sé, Choloè Tilman, hamutuk ho ekipa expozisaun Timor-Leste nian.
Iha eventu internasionál refere, artista Timor-oan nain tolu aprezenta sira nia obra artístika ne’ebé reflete riqueza kultura no identidade Timor-Leste.
Artista Verônica aprezenta kombinasaun entre múzika tradisionál Timor-Leste no sonoridade kultura ASEAN, enkuantu artista Etson Caminha no Juventino Madeira aprezenta vídeo-mapping kona-ba kultura no identidade Timor-Leste nian ba vizitante internasionál sira.
Partisipasaun ida-ne’e hatudu Timor-Leste nia kompromisu atu lori arte no kultura nasionál ba palcu mundiál, no haforsa relasaun kultura ho komunidade internasionál.
Lembra katak, iha Abril 2024, Timor-Leste partisipa ona iha Expozisaun Arte Internasionál dala-60 iha Venice, Itália, ne’ebé envolve nasaun hamutuk 90 resin.
Iha eventu refere, Timor-Leste promove obra arte konteporánea oioin no lansa filme “Kiss and Don’t Tell” ka “Rei, Maibé Labele Ko’alia”, ne’ebé prepara husi artista Maria Madeira, ho apoiu husi kuradora Profesora Natalie King, ekipa produtór Austrália, no kontribuisaun husi artista Timor-oan Alfeu Pereira, grupu Arte Moris no Fundasaun Alola. (/SMnews)
Komentariu