SMNewstl.com | Dili, 09 Maio 2026 – Atmosfera iha eventu selesaun nasional ba Dili Internasional Maratona ohin loron nakonu ho haksolok no aplaus bainhira atleta maun-alin husi Munisípiu Ermera, Jaqueu de Deus no Felisbertu de Deus, konsege domina kompetisaun no okupa pozisaun primeiru no segundu iha prova korida 21 kilometru.
Iha kompetisaun ne’ebé involve atleta hamutuk nain 280 husi munisípiu oioin iha Timor-Leste, Jaqueu de Deus hatudu kapasidade extraordinária hodi sai nu’udar vensedór prinsipal, enkuantu nia alin Felisbertu de Deus tuir kedas iha pozisaun daruak.
Rezultadu ne’e konsidera hanesan prova katak atleta sira husi Ermera iha preparasaun forte no poténsia boot atu reprezenta Timor-Leste iha eventu internasional.
Durante prova ne’ebé lao ho intensidade aas no kompetisaun maka’as, atleta rua ne’e hatudu disiplin, resisténsia no espírito kompetitivu ne’ebé hetan apresiasaun husi apoiantes no organizadór sira.
Vitória ida-ne’e la’ós deit orgullu ba família no komunidade Ermera, maibé sai mos motivasaun ba juventude Timor-Leste atu kontinua dezenvolve talento iha área desportu no atletismu.
Eventu selesaun nasional ida-ne’e realiza atu hili atleta terbaik sira atu partisipa iha Dili Internasional Maratona.
Husi total partisipante sira, atleta nain 30 mak konsege pasa ba faze tuir mai no sei tuir programa preparasaun intensivu.
Depois prosesu seleksaun remata, atleta sira ne’ebé kualifika ona sei desloka ba Karantina Gleno, Munisípiu Ermera, hodi kontinua halo preparasaun no hasa’e kondisaun física antes partisipa iha eventu internasionál ne’ebé sei realiza iha tempu badak mai.
Vitória husi maun-alin Jaqueu no Felisbertu de Deus agora sai hanesan inspirasaun boot ida ba juventude Timor-Leste, liu-liu ba sira ne’ebé iha mehi atu lori naran nasaun ba palcu desportu internasioná.(SMnewstl/)
Komentariu