SMnewstl.com Dili, 15 Agostu 2026 — Autoridade Protesaun Sivíl (APC) hato’o alerta no informasaun ba públiku kona-ba situasaun rai nakdoko ne’ebé akontese iha Flores, Nusa Tenggara Timur (NTT), Indonézia, no asegura katak Timor-Leste la hetan impaktu husi rai nakdoko no ameasa tsunami.
Rai nakdoko ne’e akontese iha 15 Agostu 2026, tuku 06:58:24, ho magnitute 7.7, ho klean tasi nian 10 quilómetru, no lokalizadu iha latitude 8.35° S no longitude 121.37° E.
APC, liuhusi Sentru Nasional Operasional Protesaun Sivíl (CNOPS-APC), kontinua halo monitorizasaun ba situasaun ne’e no akompaña informasaun husi autoridade sira kona-ba posibilidade ameasa tsunami.
Tuir informasaun ne’ebé APC simu, BMKG Indonézia termina ona alerta tsunami, depois autoridade sira halo avaliasaun no análize ba movimentu rai tasi nian no posibilidade impaktu ba área sira iha rejiaun.
APC informa katak, bazeia ba análize husi IOC/IOTWMS no Tsunami Service Provider sira husi Indonézia, Austrália no Índia, Timor-Leste la sei hetan impaktu tsunami husi eventu rai nakdoko ne’e.
APC mos husu ba komunidade atu labele paniku, maibé nafatin atensaun ba informasaun ofisiál husi autoridade kompetente no la fahe informasaun ne’ebé la iha fonte konfiável.
Autoridade Protesaun Sivíl sei kontinua halo monitorizasaun ba situasaun no sei hato’o atualizasaun ba públiku se iha mudansa ka informasaun importante foun.(SMnews)
Komentariu