SMnewstl.com ITALIA 08 Maio 2026-Iha serimónia abertura Indonesia Pavilion iha Venice Biennale 2026, Itália, Prezensa Timor-Leste marka momentu importante ida iha fortalese relasaun kultural entre Timor-Leste no Indonesia.
Prezensa Timor-Leste iha eventu internasionál ida ne’e reflete esforsu governu atu kontinua hari’i no haforsa koperasaun kultural, amizade, no diálogu entre nasaun rua ne’e.
Durante serimónia, Secretáriu Estadu Arte no Kultura Jorge Soares Cristóvão, mos simu konvite ofisiál husi organizadór Indonesia Pavilion hodi partisipa iha programa internasionál ne’ebé involve artista, kuradór, no reprezentante kultura husi nasaun oioin.
Tuir SEAK katak, Partisipasaun ne’e konsidera nu’udar oportunidade importante atu promove arte, kultura, no identidade Timor-Leste iha nivel globál, liuliu iha plataforma prestijiada hanesan Venice Biennale. Aleinde ne’e, prezensa Timor-Leste iha pavilion Indonesia mos sai sinal klaru katak relasaun diplomátika no kultural entre Timor-Leste no Indonesia kontinua forte no progresivu.
“Prezensa Timor-Leste iha Venice Biennale 2026 ne’e la’os de’it momentu simboliku, maibé mos reprezenta oportunidade estratéjika atu hatudu identidade kultural Timor-Leste ba mundu tomak. Ami hakarak kontinua hametin amizade no koperasaun kultural ho Indonesia no nasaun seluk, liuliu liuhusi arte, kreatividade, no diálogu kultural global.”Espresa sentimento Secretáriu Estadu Arte no Kultura, Jorge Soares Cristóvão.
Governante ne’e Subliña, Partisipasaun Timor-Leste iha Venice Biennale 2026 ne’e sai hanesan plataforma importante atu promove arte no identidade nasionál ba nivel internasionál. Eventu ida ne’e la’os de’it mostra kapasidade artista Timor-Leste, maibé mos reflete kompromisu forte governu atu hametin diplomasia kultural no amizade ho Indonesia no nasaun seluk iha mundu tomak.
“Ami espera katak liuhusi partisipasaun ida ne’e, artista Timor-Leste bele hetan oportunidade boot atu interage, aprende, no kolabora ho artista internasionál sira, hodi lori naran Timor-Leste sai aas liután iha arena global.”SEAK Hakotu.(/Smnews)
Komentariu