SMNews.com | Díli, 11 Maiu 2026 – Vise-Primeiru-Ministru no Ministru Koordenadór ba Asuntu Ekonómiku, inklui Ministru Turizmu no Ambiente, Dato’ Seri Francisco Kalbuadi Lay, hala’o vizita servisu iha área Portu Tuan, Baía Díli, Segunda (11/05), hodi observa diretamente preparasaun fatin ne’ebé sei sai nu’udar área konstrusaun ba projetu boot Sentru Konvensaun Internasionál (International Convention Center).
Vizita ida ne’e hatudu komitmentu Governu atu acelera dezenvolvimentu infraestrutura moderna iha kapitál Díli, ne’ebé konsidera nu’udar projetu estratéjiku nasional ida atu transforma imagem cidade Díli no prepara Timor-Leste simu eventu internasionál sira iha futuru.
Tuir planu Governu nian, lansa fatuk dahuluk ba projetu ne’e sei realiza iha loron 20 Maiu 2026, hamutuk ho komemorasaun Loron Restaurasaun Independénsia ba dala-24 Timor-Leste nian.
Sentru Konvensaun Internasionál ne’e sei sai nu’udar sentru modernu ida ho fasilidade kompletu hanesan sala konferénsia prinsipál, auditóriu, pavillaun espozisaun, akuáriu, paseiu tasi-ibun, no sentru entretenimentu no komérsiu ne’ebé espera bele atrai investimentu no turistas husi rai-li’ur.
Projetu ne’e mos konsidera importante atu suporta preparasaun Timor-Leste ba Prezidénsia ASEAN iha tinan 2029, ne’ebé presiza infraestrutura adekuada atu simu enkontru no eventu internasionál sira ho padraun modernu.
Konstrusaun Sentru Konvensaun Internasionál tuir planu sei realiza durante períodu 2026 to’o 2028 no espera bele remata antes Timor-Leste simu responsabilidade boot nu’udar Prezidente ASEAN.
Rekorda katak, iha loron 24 Setembru 2025, Primeiru-Ministru Kay Rala Xanana Gusmão hamutuk ho Primeiru-Ministru Malázia, Dato’ Seri Anwar Ibrahim, no entidade importante sira husi Governu no korpu diplomátiku, lansa oficialmente dezeñu projetu Sentru Konvensaun Internasionál ba públiku iha Portu Tuan, Baía Díli.(SMnewss/)
Komentariu