Smnewstl.com (Dili) — Archebispo Metropolitanu Arkidioseze Dili, Dom Virgílio do Carmo da Silva, nafatin enkoraja sidadaun sira-ne’ebé seidauk simu vasina atu hakbesk-aan bá sentru saúde sira hodi simu vasina, nune’e bele haforsa imunidade hasoru vírus Covid-19 ho variante seluk.
Dom Virgílio do Carmo da Silva hato’o apela ne’e, hodi hasoru malu ho Primeiru-Ministru (PM), Taur Matan Ruak, sesta (13/08/21) iha rezidénsia Farol, Dili.
“Segundu ita mós kontinua apela bá sira-ne’ebé seidauk konvensidu, agora laiha dalan seluk, Covid-19 ne’e ita dehan, hela de’it ona iha fatin seluk labele mai ne’e ita mehi de’it ona, agora ne’e hakarak ga lakohi ne’e nia iha ita-nia le’et, ne’ebé ita mak hakarak ita lakohi sai vítima bá Covid-19 vírus ida-ne’e, ita tenki vasina atu foti ita-nia,” apela Dom Virgílio.
Dom Virgílio afirma, maske vasina la’ós obrigatóriu bá sidadaun sira, maibé, bá sira-ne’ebé seidauk vasina tenki respeitu ema seluk nia saúde no moris, nune’e vírus ne’e labele da’et bá ema ne’ebé simu imunizasaun.
“Ha’u hanoin ida-ne’e husu ita ida-idak atu hola konsisténsia desde ita hadomi ita-nia aan no hadomi ita-nia maluk, ita-nia viziñu ita-nia família sira, ne’e obrigasaun ita-nian atu halo ida-ne’e, liberdade duni, mais ita mós keta hanoin de’it kona-ba ita-nia aan, maibé tenki hanoin mós kona-ba ema seluk nia saúde, ema seluk nia di’ak,” afirma Dom Virgílio.
Archebispo Metropolitanu Arkidioseze Dili ne’e mós apresia no agradese bá inan-aman sira-ne’ebé mak simu ona vasina kontra Covid-19, tanba antes ne’e sira tauk atu vasina.
“Uluk susar, maibé agora ita haree katak, ida-ne’e neineik mosu vontade ema barak komesa buka atu vasina, tanba ida-idak komesa sente hakarak atu lívre husi moras ida-ne’e, primeiru ita fó agradese ita apresia, tanba ita-nia maun alin, inan-aman sira barak ne’ebé agora dadauk komesa hakat bá atu buka vasina, ne’e buat ida ita hotu tenki apresia,” tenik nia.(ant)
Komentariu