SMnewstl.com | Viqueque, 15 Agostu 2026 — Deskonfia membru ida husi Unidade Tranzitu PNTL envolve iha insidente tiru joven ida ho inisial SG, iha Suku Irabin de Baixo, Postu Administrativu Watucarbau, Munisípiu Viqueque, iha Sabadu (15/08).
Tuir informasaun ne’ebé SMnewstl.com hetan husi Xefe Suku Irabin de Baixo, José Baptista do Carmo, haktuir insidente ne’e akontese iha tuku 08:00 dadeer, bainhira vítima liu iha área besik Eskola EBC 13, Aldeia Taraday, Suku Irabin de Baixo, ho motorizada no deskonfia la uza kapasete.
Iha momentu ne’ebá, membru PNTL husi Unidade Tranzitu hala’o hela servisu iha área refere atu fasilita movimentasaun estudante sira. Maibé, akontese desentendimentu entre vítima no membru Tranzitu, ne’ebé ikusmai deskonfia eskala sai violénsia no uza arma de fogo hodi tiru vítima.
Tuir informasaun ne’ebé hetan, vítima hetan kanek grave no agora daudaun hala’o hela tratamentu iha Hospital Munisípiu Viqueque. Vítima mos sei hein aviaun atu transporta ba Hospital Nasionál Guido Valadares, iha Dili, hodi hetan tratamentu médiku liután.
Xefe Suku Irabin de Baixo, José Baptista do Carmo, lamenta no manifesta tristeza kona-ba insidente ne’e, liuliu tanba envolve membru PNTL.
Nia husu atu kazu ne’e rezolve tuir lei ne’ebé vigora no prosesu investigasaun hala’o ho transparénsia, atu bele hatene klaru faktu sira no responsabilidade husi parte hotu ne’ebé envolve iha insidente ne’e.
Até agora, autoridade kompetente seidauk hato’o klarifikasaun ofisiál kona-ba kronolojia kompleta no razaun ne’ebé lori ba insidente tiru ne’e.(Smnews)
Komentariu