SMnewstl.com | Dili, 13 Novembru 2026 – Primeiru-Ministru (PM) Kay Rala Xanana Gusmão reprezenta Timor-Leste iha Simeira ASEAN ba Dala 49⁰ no Enkontru Relasionadu (49th ASEAN Summit and Related Summits), ne’ebé hala’o iha Manila, Repúblika Filipinas, hosi 11 to’o 18 Novembru 2026.
Partisipasaun PM Xanana iha enkontru rejionál ne’e sai oportunidade importante ba Timor-Leste atu hametin relasaun diplomátika, kooperasaun ekonómika no parseria estratéjika ho nasaun membru ASEAN no parseiru diálogu sira.
Iha enkontru ne’e, PM Xanana sei partisipa iha diskusaun nível lideransa ho xefe Estadu no xefe Governu husi nasaun membru ASEAN, atu ko’alia kona-ba asuntu estratéjiku sira ne’ebé iha relasaun ho dezenvolvimentu, estabilidade no futuru organizasaun rejionál ne’e.
Tuir programa ofisiál, iha 15 Novembru 2026, PM Xanana sei partisipa iha serimónia abertura 49.º Simeira ASEAN, ne’ebé sei inklui aprezentasaun Akordu Kuadru Ekonomia Dijitál (Digital Economy Framework Agreement), inaugurasaun símbolu ASEAN ne’ebé atualiza, hasae bandeira ASEAN foun no entrega ASEAN Prize.
Iha loron hanesan, sei hala’o sesaun plenária no sesaun retreat, ne’ebé fó oportunidade ba líder sira atu diskute prioridade no direksaun estratéjika ASEAN ba futuru, inklui esforsu atu hametin unidade no integrasaun rejionál.
PM Xanana mós sei partisipa iha enkontru ho reprezentante Parlamentu ASEAN (AIPA), juventude ASEAN no Konsellu Konsultivu Negósiu ASEAN (ASEAN-BAC). Enkontru hirak-ne’e sei foka ba kontribuisaun parlamentu, juventude no setór privadu iha prosesu dezenvolvimentu no integrasaun rejionál.
Iha 16 Novembru, ajenda sei kontinua ho enkontru ASEAN ho parseiru estratéjiku sira, inklui Repúblika Populár Xina, Repúblika Koreia, Nasoins Unidas no Austrália, hodi hametin kooperasaun no parseria entre ASEAN ho parseiru internasionál.
Enkuantu iha 17 Novembru, PM Xanana sei partisipa iha ASEAN Plus Three, Reuniaun Lideransa Komunidade Ázia Zero Emisaun (AZEC), Simeira ASEAN-Japão, Simeira ASEAN-Índia no 21.º Simeira Ázia Leste (East Asia Summit – EAS).
Programa 49.º Simeira ASEAN sei remata ho serimónia enseramentu no entrega Prezidénsia ASEAN ba Singapura, ne’ebé sei assume lideransa organizasaun rejionál ne’e iha períodu tuirmai.
Partisipasaun Timor-Leste iha enkontru rejionál ne’e reprezenta kompromisu nasaun nian atu kontinua kontribui ba hametin unidade, dame, estabilidade, seguransa no prosperidade ekonómika iha rejiaun Ázia Sudeste.
Timor-Leste sai nu’udar membru permanente ASEAN ba 11.º iha 26 Outubru 2025, no kontinua partisipa ativu iha prosesu integrasaun rejionál.
Delegasaun sira sei remata sira-nia programa iha Filipinas iha 18 Novembru 2026.
Komentariu