SMnewstl.com | Liquiçá, 6 Novembru 2026 — Ekipa Misaun Lepra hamutuk ho Autoridade Munisipál Liquiçá no Autoridade Suku Tíbar, hala’o kampaña sensibilizasaun públika durante loron tolu iha Suku Tíbar, Munisípiu Liquiçá, atu hasa’e konsiénsia komunidade kona-ba importánsia mantein ambiente moos no saudável.
Jestor Misaun Lepra, Francisco da Costa, esplika katak kampaña ne’e hala’o liuhusi mobilizasaun komunidade no distribuisaun estiker ba kareta, motór no transporte públiku. Atividade ne’e iha objetivu atu informa no eduká kondutór no pasajeiru sira kona-ba responsabilidade la soe lixu arbiru iha estrada no fatin públiku.
Inisiativa ne’e mos mai husi preokupasaun kona-ba hahalok utilizadór transporte balu ne’ebé soe lixu, hanesan botir, kopu no plastik, husi veíkulu ba estrada. Hahalok ne’e bele hamosu poluisaun, estraga ambiente no afeta saúde komunidade.
Organizadór relata katak iha semana kotuk, ekipa distribui ona estiker besik rihun ida ba utilizadór transporte sira. Enkuantu iha kampaña loron ne’e, ekipa aumenta tan distribuisaun estiker liu rihun ida, hodi kontinua habelar mensajen edukativu kona-ba responsabilidade hamutuk atu kuidadu ambiente.
Iha okaziaun ne’e, Prezidente Autoridade Munisipál Liquiçá, Paulinu Ribeiro, apela ba sidadaun sira ne’ebé mai husi Munisípiu Ermera, Dili no Bobonaro, atu bainhira tama iha territóriu Liquiçá, hametin responsabilidade hodi mantein ambiente moos, liuliu la soe lixu arbiru iha estrada no dalan ninin.
Nia husu mos ba pasajeiru no viajante sira atu rai plastik no embalajen sasán iha kareta nia laran, no soe de’it iha fatin ne’ebé apropriadu. Hahalok simples ne’e bele ajuda prevene poluisaun no mantein fatin públiku moos no saudável.
Aleinde limpeza ambiente, Paulinu Ribeiro mos apela ba komunidade atu kontrola animal hakiak no la husik sira sai livre iha estrada no fatin públiku, tanba hahalok ne’e bele hamosu asidente no tau utilizadór estrada sira nia vida iha risku.
Tanba ne’e, nia husu komunidade atu asegura katak animal hakiak sira hela iha fatin apropriadu no la sai ba estrada ne’ebé bele hamosu perigu ba ema seluk.
Liuhusi kampaña sensibilizasaun ne’e, Misaun Lepra no Autoridade Munisipál Liquiçá hein katak komunidade sei aumenta koñesimentu no muda hahalok, hodi hametin kultura soe lixu iha fatin apropriadu no kuidadu ambiente.
Responsabilidade atu mantein ambiente moos la’ós de’it autoridade sira nian, maibé responsabilidade sidadaun hotu-hotu atu asegura ambiente saudável, ordenadu no seguru ba jerasaun agora no futuru.
Komentariu