Smnewstl.com (Dili) — Ministériu Ensinu Superiór, Siénsia no Kultura (MESSK), sei estuda proposta husi igreja katólika nian ne’ebé hato’o ona atu harii universidade katólika Timorense iha Balide Dili.
Archebispo Metropolitanu Arkidioseze Dili, Dom Virgílio do Carmo da Silva ho ekipa, atualiza informasaun refere kona-ba inisiativa igreja nian atu harii universidade katólika Timorense bá Primeiru-Ministru (PM), Taur Matan Ruak.
Tanba informasaun kona-ba kriasaun universidade katólika Timorense ne’e komesa esplla ona iha públiku, nune’e igreja iha responsabilidade atu esplika bá xefe governu sobre inisiativa refere.
“Maske lisensa sei hein Ministériu Ensinu Superiór sei estuda hela, maibé ami hakarak mós partilla bá nia (PM Taur) kona-ba inisiativa Arkidioseze ninian atu harii universidade katólika,” dehan Dom Virgílio do Carmo, sesta (13/08/21) hafoin remata enkontru ho Xefe Governu iha rezidénsia Farol, Dili.
Dom Virgílio rekoñese, inisiativa harii universidade katólika ne’e la’ós mai husi nia, maibé desde tinan 2002 inisiativa mai husi Dom Carlos Filipe Ximenes Belo, no kontinua husi matebian Dom Alberto Ricardo da Silva to’o hakostu iis.
“Inisiativa ida-ne’e la’ós ha’u-nian, tanba ida-ne’e mai kuaze dékade tinan 20 liu bá hahú tiha ona iha Dom Carlos nia tempu, 2002 sira hahú tiha ona forma ekipa ida halo estudu viabilidade, depois mai Dom Carlos rejignasaun, mai Dom Alberto Ricardo matebian hahú Dom Alberto Ricardo komesa tau primeira pedra halo iha Balide depois kuandu nia mate buat hotu para tiha,” esplika Dom Virgílio.
Dom Virgílio afirma, bainhira sai Bispo Dioseze Dili iha tinan 2016, sente laiha korajen atu kontinua inisiativa ne’ebé predesesor sira husik hela, tanba komplikadu tebes.
Nune’e, iha tinan lima ikus ne’e, halo aproximasaun oin-oin konsege realiza duni inisiativa refere, tanba konsidera hanesan nesessidade ikus bá uma kreda nian.
“Ha’u tama mai iha 2016 buat barak la’o tiha infraestrutura komesa hahú ami koko atu kontinua, maibé atu hahú universidade momentu ne’ebá, tanba buat barak liu, entaun ha’u laiha korajen atu hala’o ida-ne’e, tinan 5 nia laran kontinua halo aproximasaun husi dalan oi-oin ikus mai ami haree katak, ida-ne’e la’ós de’it ona ha’u-nia hakarak, maibé ida-ne’e hanesan nesesidade ida ikus mak ami lori duni bá realizasaun,” afirma nia.
Xefe Governu, Taur Matan Ruak sente kontente no apresia, tanba uma kreda reativa fali inisiativa ne’e.
Tempu badak, ekipa instaladora husi igreja katólika sei aprezenta programa nu’udar faze ikus nian bá MESSK molok tun bá terenu antes halo aprovasaun.
Oras ne’e dadauk, ekipa instaladora husi Dioseze mantein konhaktu ekipa husi MESSK atu haree bá pontu importante ruma ne’ebé seidauk klaru.(ant)
Komentariu