Smnewstl.Com | Dili, 10 Novembru 2026 – Primeiru-Ministru (PM), Kay Rala Xanana Gusmão, akompañadu hosi Ministra Edukasaun, Dulce de Jesus Soares, inaugura edifísiu foun Eskola Ensinu Báziku Filiál (EBF) 12 Outubru, iha Tasi-Tolu, Munisípiu Dili, tersa-feira (10/11).
Iha serimónia inaugurasaun ne’e, PM Xanana apela ba estudante sira no inan-aman atu aproveita ho di’ak oportunidade edukasaun ne’ebé disponivel, liuhusi konstrusaun edifísiu eskola foun ne’e, hodi aprende ho seriedade no prepara an ba futuru.
“Eskola ne’e ita-nia parseiru sira halo la’ós tanba ha’u ka Ministra Edukasaun, maibé tanba sira-nia fuan boot ne’ebé fó ba labarik sira. Tanba ne’e, eskola furak ne’e harii atu estuda, la’ós atu halimar de’it”, PM Xanana apela.
Konstrusaun edifísiu foun ne’e responde ba nesesidade sala-de-aula ne’ebé antes ne’e la sufisiente, tanba númeru estudante ne’ebé aumenta la hanesan ho kapasidade sala-de-aula disponivel, ne’ebé afeta prosesu aprendizajen.
Ho infraestrutura foun ne’e, estudante sira sei hetan ambiente aprendizajen ne’ebé seguru, di’ak no konfortável liu, tanba edifísiu ne’e inklui sala-de-aula no fasilidade sanitária atu suporta atividade eskolar.
Iha parte seluk, Diretora Ezekutiva (CEO) hosi Classroom of Hope, Tanya Armstrong, esplika katak konstrusaun edifísiu eskola ne’e utiliza materiál Eco-Block, ho apoiu finanseiru hosi organizasaun Classroom of Hope, ne’ebé hetan apoiu hosi Austrália no Singapura atu kontribui ba dezenvolvimentu edukasaun iha Timor-Leste.
Nia hateten katak, bainhira asina akordu konstrusaun eskola ne’e, organizasaun Classroom of Hope iha kompromisu atu garante katak labarik ida-idak merese hetan ambiente seguru no saudável ba prosesu aprendizajen.
Durante ne’e, Classroom of Hope servisu hamutuk ho komunidade sira iha rejiaun Sudeste Aziátiku, liuliu iha inisiativa hadi’a infraestrutura eskola iha Illa Lombok, Indonézia, ne’ebé antes ne’e hetan impaktu hosi dezastre rai-nakdoko no estraga edifísiu eskola barak.
“Ami harii ona liu 50 eskola uza bloku sira-ne’e, ho sala-de-aula hamutuk liu 200. Ida-ne’e mak ami-nia projetu pilotu iha Timor-Leste. Ba dala uluk ami harii eskola iha ne’e, no ida-ne’e oportunidade atu hatudu saida mak ita bele alkansa bainhira servisu hamutuk”, Tanya Armstrong hateten.
Didin sala-de-aula sira-ne’e konstrui ho bloku Eco-Block ne’ebé produz hosi plástiku resikladu, liuhosi prosesu halibur, hamoos no transforma lixu plástiku sai materiál konstrusaun ne’ebé metin no rezistente.
Projetu ne’e konsege reutiliza plástiku resikladu hamutuk tonelada 13 atu konstrui sala-de-aula neen. Konstrusaun ne’e hala’o durante fulan tolu, kompara ho métodu konstrusaun konvensionál ne’ebé bele presiza tempu to’o fulan neen atu kompleta.
Além ne’e, bloku Eco-Block ne’ebé utiliza iha konstrusaun ne’e dezenvolve atu garante seguransa ba labarik sira, ho durabilidade ne’ebé bele to’o tinan 50. Materiál ne’e mós ajuda regula temperatura iha laran sala-de-aula atu sai malirin liu, hodi fó konfortu ba estudante sira, liuliu durante tempu manas.
“Obrigada tanba fiar ami atu harii eskola ida-ne’e. Ami fiar katak sei iha oportunidade atu kontinua harii tan sala-de-aula sira iha Timor-Leste”, nia subliña.
Classroom of Hope mak organizasaun ne’ebé promove konstrusaun edifísiu eskola ho utilizasaun materiál resikladu iha nasaun sira ne’ebé dezenvolve hela, ho objetivu atu hadi’a asesu ba edukasaun ho kualidade, no kria ambiente aprendizajen ne’ebé moos, seguru no sustentável.
Serimónia inaugurasaun edifísiu foun EBF 12 Outubru ne’e mós partisipa hosi estudante, inan-aman no manorin sira, nu’udar parte hosi esforsu hamutuk atu hadi’a infraestrutura no kualidade edukasaun iha Timor-Leste.
Komentariu