Smnewstl.com, Dili, 27 Outubru 2026 — Funsionáriu públiku Timoroan na’in-30 husi ministériu oioin kompleta ho susesu Kursu Lian Inglés Báziku no Kapasidade Komunikasaun, ne’ebé hetan apoiu husi Governu Singapura liuhusi Inisiativa ba Integrasaun ASEAN (IAI), atu hametin sira-nia abilidade komunikasaun no prepara an ba partisipasaun efetiva iha atividade rejionál ASEAN.
Kursu ne’e hala’o durante loron 5 to’o 23 Outubru 2026, ho objetivu atu hadi’a koñesimentu báziku partisipante sira nian kona-ba lian Inglés, liuliu iha ko’alia, rona, hakerek no komunikasaun interpesoál. Programa ne’e mós foka ba hasa’e konfiansa partisipante sira atu uza lian Inglés iha ambiente profisionál no iha komunikasaun loroloron.
Liuhusi aula interativa no ezersísiu prátiku, partisipante sira hetan oportunidade atu dezenvolve kapasidade komunikasaun ne’ebé bele aplika diretamente iha sira-nia responsabilidade servisu, inklui hakerek e-mail profisionál, partisipa iha reuniaun no troka ideia ho parseiru internasionál.
Embaixadóra Singapura ba Timor-Leste, Teo Lay Cheng, hato’o parabéns ba partisipante sira tanba kompleta programa ne’e ho susesu. Nia subliña importánsia lian Inglés nu’udar lian servisu ASEAN nian, no salienta katak profisiénsia iha lian ne’e bele ajuda funsionáriu Timoroan sira atu komunica ho efetivu liután ho kolega no parseiru sira husi nasaun membru ASEAN seluk.
Embaixadóra Teo mós enkoraja partisipante sira,atu kontinua pratika lian Inglés maski kursu remata ona, tanba pratika kontinua no vontade atu aprende husi sala mak parte importante husi prosesu aprendizajen.
“Konfiansa mai husi pratika, no halo sala mak parte naturál ida husi prosesu aprendizajen,” Embaixadóra Teo afirma.
Nia aumenta tan katak nia hein partisipante sira sei uza kapasidade foun ne’ebé sira hetan iha sira-nia fatin servisu no iha interasaun ho kolega sira husi nasaun membru ASEAN seluk.
Partisipante sira mós hato’o apresiasaun ba programa ne’e, ne’ebé konsidera iha benefísiu diretu ba sira-nia dezenvolvimentu profisionál.
Zeferino da Costa Bobo, husi Institutu Nasionál Seguransa Sosiál (INSS) hateten katak,kursu ne’e ajuda nia atu aprende hakerek e-mail profisionál no komunika ho klaru liuhusi lian Inglés.
“Kursu ne’e ajuda hasa’e ha’u-nia konfiansa atu komunika ho parseiru internasionál no kliente sira. Ha’u sei uza kapasidade hirak-ne’e iha ha’u-nia servisu iha INSS atu esplika di’ak liután kona-ba servisu seguransa sosiál,” nia dehan.
Enkuantu ne’e, Eliseo Pedro A. S. Borges, husi Ministériu Asuntu Ekonómiku, Turizmu no Ambiente, konsidera katak kursu ne’e importante ba responsabilidade profisionál funsionáriu sira nian, liuliu atu hadi’a kapasidade ko’alia, hakerek no partisipa iha reuniaun sira uza lian Inglés.
Nia hateten katak,kapasidade hirak-ne’e sei ajuda funsionáriu sira atu troka ideia no komunika ho efetivu liután bainhira kolabora ho kolega sira husi nasaun membru ASEAN seluk. Koñesimentu ne’ebé sira hetan sei aumenta mós sira-nia konfiansa no profisionalizmu atu envolve an iha atividade rejionál iha futuru.
Enkuantu Timor-Leste kontinua hametin nia integrasaun iha ASEAN, kapasidade uza lian Inglés sai importante liután atu permite funsionáriu públiku sira partisipa ho efetivu iha diskusaun, reuniaun no atividade kooperasaun rejionál.
Programa ne’e reflete kompromisu kontinua husi Singapura atu apoia dezenvolvimentu rekursu umanu no esforsu hametin kapasidade institusionál iha Timor-Leste, liuliu iha preparasaun ba partisipasaun ativa iha ASEAN.
Inisiativa ba Integrasaun ASEAN (IAI), ne’ebé hahú iha tinan 2000, iha objetivu atu hamenus diferensa dezenvolvimentu entre Estadu Membru ASEAN sira,no hametin integrasaun rejionál. Liuhusi asisténsia téknika, treinamentu no programa dezenvolvimentu kapasidade, inisiativa ne’e apoia nasaun membru sira atu hasa’e sira-nia kapasidade no partisipa ho efetivu liután iha atividade no prosesu ASEAN nian.(Smnews/)
Komentariu