Smnewstl.com, Dili 11 Novembro 2026-Unidade Polísia Marítima (UPM), hamutuk ho Falintil-Força Defeza Timor-Leste (F-FDTL) no Servisu Nasionál Intelijénsia (SNI), konsege prende sasán ne’ebé suspeita kontrabandu iha área tasi-ibun Batoboro, Postu Administrativu Maubara, Munisípiu Likisá, iha 11 Novembru 2026, tuku 02:00 madrugada. Maibé, na’in ba sasán ne’e konsege halai molok ekipa kaptura.
Komandante Interinu UPM, Superintendente Asisténsia Polísia Lino De Jesus Vinhas, esplika katak operasaun ne’e hala’o depois ekipa konjunta simu informasaun husi fonte kona-ba ro ida ne’ebé sei lori sasán kontrabandu atu hatun iha área Likisá.
Bazeia ba informasaun ne’e, Komandante Kompañia Vizilánsia, Inspetór Joel da Silva, organiza ekipa no koloka pontu kontrolu (check point) iha Batoboro, Maubara.
“Depois simu informasaun husi fonte katak iha ro ida sei hatun sasán iha área Likisá, ami organiza ekipa no halo check point iha Batoboro. Iha tuku 02:00 madrugada, ekipa konsege kaptura sasán kontrabandu iha tasi-ibun área Maubara. Maibé na’in ba sasán ne’e halai, no ro ne’ebé sira uza halai mamuk fila fali ba tasi-laran,” dehan Lino De Jesus Vinhas ba jornalista sira.
Nia afirma katak, maski ekipa konjunta konsege prende sasán hirak ne’e, maibé suspeitu sira konsege halai molok ekipa kaptura sira. Tanba ne’e, autoridade sira seidauk konsege identifika no detein na’in ba sasán hirak ne’e.
Sasán ne’ebé prende inklui HM Oil Transmission Gear Oil ho volume 120 mililitru, iha kaixa hamutuk 75, no HM Oil MPX2 ho volume 0,8 litru, iha kaixa hamutuk 7.
Komentariu