Smnewstl.com | RAEOA, 27 Abril 2026 – Operasaun surpriza husi Polícia Científica de Investigação Criminal (PCIC) akontese dader ohin iha edifísiu Gabinete Prezidente Autoridade Rejiaun Administrativa Espesiál Oekusi Ambenu (RAEOA), bainhira forsa investigasaun “serku” área refere hodi hala’o operasaun buska no apreensaun.
Tuir informasaun ne’ebé asesu husi SMnews, operasaun ne’e hahú por volta tuku 6:00 dader, ho prezensaun intensiva husi ekipas PCIC iha edifísiu Gabinete Prezidente RAEOA.
Asaun ne’e liga ho suspeita katak iha atividade ruma ne’ebé la lao tuir prosedimentu legál iha instituisaun refere.
Fontes ne’ebé besik ho fatin akontesimentu hatete katak, to’o oras ne’e, parte balun husi funsionáriu no ema ne’ebé akompaña servisu iha edifísiu ne’e la hatene klaru kona-ba razaun exata husi prezensa PCIC nian, tanba operasaun ne’e hala’o ho forma sigilózu no kontroladu.
Ekipa Polícia Científica Investigação Criminal kontinua hala’o prosesu buska iha edifisiu laran, inklui rekoilha dokumentus no evidénsia sira ne’ebé konsidera importante ba investigasaun ne’ebé daudaun la’o hela.
To’o agora, seidauk iha deklarasaun ofisiál husi autoridade kompetente sira kona-ba rezultadu operasaun ne’e ka natureza kompleta husi suspeita ne’ebé halo baze ba intervensaun PCIC.
Kazus ida ne’e aumenta atensaun públiku ba governasaun no transparénsia iha Autoridade da Região Administrativa Especial de Oecusse-Ambeno, ho espectativa katak investigasaun ne’e sei fó klaridade no responsabilidade tuir lei.
SMnews sei kontinua akompaña dezenvolvimentu kazu ne’e hodi fó informasaun aktualizada ba públiku. (/SMnews)
Komentariu