Smnewstl.com | Dili, 03 Novembru 2026 – Iha esforsu atu mantein seguransa no orden públiku durante Selebrasaun Loron Matebian, (Fiando),Konselho Polisiamento Komunitária (KPK) fó apoiu ba Polícia Nasionál Timor-Leste (PNTL) hodi intensifika patrulla iha kapitál Dili.
Patrulla konjunta ne’e sai nu’udar medida preventiva atu asegura ambiente seguru ba komunidade sira ne’ebé halo vizita ba família no maluk sira ne’ebé hakmatek ona iha semitériu, inklui sidadaun sira ne’ebé hala’o atividade relijioza no komemorativa durante Loron Matebian.
Liuhusi kooperasaun ne’e, KPK no PNTL hamutuk hala’o esforsu atu monitoriza situasaun seguransa iha área sira, prevene asaun kriminál no evita problema ne’ebé bele hamosu distúrbiu ba komunidade.
Presensa forsa seguransa iha dalan no fatin públiku sira mós importante atu garante movimentu sidadaun sira lao ho seguru, liuliu iha tempu ne’ebé tráfiku no atividade komunidade aumenta tanba komemorasaun Loron Matebian.
Iha oportunidade ne’e, komunidade husu atu kontinua kolabora ho autoridade seguransa, respeita regra no orden públiku, no evita hahalok ne’ebé bele ameasa seguransa ema seluk.
Ho apoiu KPK no patrulla PNTL, hein katak komemorasaun Loron Matebian iha Dili bele lao ho dame, orden no seguransa, nu’udar momentu atu família no komunidade sira hanoin no fó omenajen ba sira-nia matebian.
Komentariu