Smnewstl.com, Dili 10 Novembru 2026 – Polísia Nasionál Timor-Leste (PNTL) konsege kaer ona suspeitu ida ne’ebé alegadamente envolve iha kazu atake hasoru professora ida iha Suku Hatas, Postu Administrativu Atabae, Munisípiu Bobonaro. Relasiona ho akontesimentu ne’e, Ministra Edukasaun, Dulce de Jesus Soares, manifesta tristeza profunda no preokupasaun kona-ba seguransa professora sira ne’ebé hala’o knaar iha área rurál.
Tuir informasaun ne’ebé ministra simu katak PNTL konsege kaer suspeitu ne’e depois liu loron ida resin husi akontesimentu. Atualmente, prosesu investigasaun kontinua hela atu klarifika kauza no responsabilidade husi ema ne’ebé alegadamente envolve iha kazu ne’e.
Ministra Dulce de Jesus Soares esplika katak kaben husi professora ne’ebé sai vítima husu ba Ministériu Edukasaun atu transfere nia feen ba eskola ne’ebé besik liu ho sira-nia hela-fatin, atu bele kontinua hala’o knaar hanorin iha ambiente ne’ebé seguru.
Maibé, tuir ministra nia esplikasaun, komunidade lokál husu atu professora ne’e kontinua hela no hala’o ninia servisu iha fatin ne’ebá, no komunidade mós fó garantia atu ajuda asegura ninia seguransa.
Kona-ba kondisaun hela-fatin, ministra informa katak professora ne’e la hela mesak iha rezintu ne’ebá. Iha rezidénsia iha área hanesan ne’e mós hela professora na’in tolu no médiku ida, maski sira ida-idak hela iha uma diferente.
Ministra Edukasaun mós esplika katak Governu, liuhusi Ministériu Edukasaun, kontinua halo esforsu atu rekruta profesór sira bazeia ba kritériu méritu no distribui sira ba munisípiu no suku sira, tuir nesesidade servisu edukasaun.
ME hateten katak professora ne’ebé sai vítima iha kazu ne’e mai husi Atabae, maibé iha prosesu distribuisaun profesór, hetan alokasaun atu hanorin iha suku seluk. Akontesimentu ne’e sai preokupasaun ba Ministériu Edukasaun, liuliu kona-ba seguransa profesór sira ne’ebé hala’o knaar iha área rurál.
ME Dulce de Jesus Soares apela ba sidadaun no parte hotu atu respeita prosesu investigasaun no husik autoridade kompetente hala’o sira-nia knaar tuir lei, hodi asegura justisa no kumprimentu lei ne’ebé vigora iha Timor-Leste.
Komentariu