Smnewsewstl.com | Dili, 21 Outubru 2026 — Komandante-Jerál Polísia Nasionál Timor-Leste (PNTL), Komisáriu Asistente Polísia Afonso dos Santos, ezije ba Komisaun Organizadora ba Rekrutamentu PNTL 2026,atu hala’o prosesu seleksaun membru foun ho transparénsia, justisa no integridade, lahó favoritizmu ka nepotizmu.
Ezijénsia ne’e hato’o iha Kuartel Jerál PNTL, iha kuarta-feira ne’e, atu garante katak kandidatu hotu hetan oportunidade hanesan no seleksaun hala’o tuir kritériu ne’ebé estabelese.
Konjer Afonso dos Santos enfatiza katak kandidatu hotu tenke hetan avaliasaun bazeia ba kapasidade, kompeténsia no rezultadu ne’ebé sira hetan durante prosesu seleksaun, la’ós tanba relasaun família ka interese pesoál.
Tuir nia katak Komisaun Organizadora aprezenta ona dokumentu kona-ba kandidatu sira ne’ebé tuir ona ezame , nu’udar parte husi prosesu rekrutamentu tinan 2026.
Komandante-Jerál PNTL subliña katak,kandidatu sira ne’ebé kumpre kritériu no hetan rezultadu tuir regra mak bele kontinua ba etapa tuirmai.Tanba ne’e, Komandante-Jerál Polísia Nasionál Timor-Leste,husu Komisaun Organizadora atu mantein kritériu seleksaun ne’ebé klaru no justu, no evita alterasaun ne’ebé bele fó vantajen ba kandidatu balu ka permite kandidatu atu pasa ba etapa tuirmai sem konsidera rezultadu ne’ebé sira hetan.
Prosesu rekrutamentu ne’ebé transparente no bazeia ba méritu konsidera importante atu hametin konfiansa públiku ba PNTL, no garante katak membru foun sira iha kapasidade, kompeténsia no responsabilidade atu hala’o knaar ho profesionalizmu, hodi serve povu no nasaun.(#Smnews/)
Komentariu