Smnewstl.com | JAKARTA, 02 Maiu 2026 — Momentu ida ne’ebé emosional no simboliku akontese iha Jakarta, bainhira Primeiru-Ministru Kay Rala Xanana Gusmão hasoru fila-fali ho Majór-Jenerál reformadu TNI, Mahidin Simbolon, iha Hotel Kempinski Jakarta, sábadu (02/05).
Hasoru-malu ne’e marka momentu istóriku ida, tanba rua-ne’e la hasoru malu durante tinan 34, desde kapturasaun Xanana iha tinan 1992 durante okupasaun Indonézia iha Timor-Leste.
Durante períodu ne’ebá, Mahidin Simbolon, ne’ebé uluk ofisiál Komando Pasukan Khusus (Kopassus), envolve direta iha operasaun militár ne’ebé lori ba kapturasaun Xanana Gusmão iha Lahane, Dili.
Tuir komunikadu imprensa ne’ebe Smnews asesu, Xanana konta katak iha momentu kapturasaun, nia subar iha Aliança Araújo nia uma iha Lahane, maibé forsa Kopassus sira konsege prende nia no lori ba kuartél militár, antes transfere ba Bali no Jakarta ba prosesu interrogatóriu.
“Kleur ona foin mak hasoru-malu. Nia mós katuas ona. Iha 1992 nia mak Tenente Koronél ne’ebé kaer ha’u iha Lahane,” dehan Xanana ho tom refleksivu.
Hasoru-malu ida ne’e akontese depois Mahidin Simbolon husu liu-hosi Embaixadór Timor-Leste iha Indonézia, Roberto Soares, atu organiza enkontru ne’e, hafoin rona katak Xanana sei pasa iha Jakarta.
Durante enkontru, sira ko’alia kona-ba tempu uluk, partilha memórias no ko’alia iha lian Tetum. Maski relasaun uluk konténu ho konflitu no terus, rua-ne’e konkorda katak pasadu presiza tau ba kotuk no la bele kontinua ho ódiu.
“Ho espíritu amizade, ita lembra uluk hanesan saudade deit. Hasoru-malu ohin lori kontente ba ami nia laran,” Xanana dehan.
Depois independénsia, Kay Rala Xanana Gusmão kontinua promove politika rekonsiliasaun ho Indonézia, inklui ho antigu líder militár sira hanesan Wiranto no Prabowo Subianto.
Hasoru-malu ne’e akompaña hosi Vise-Primeiru-Ministru no Ministru Turizmu no Ambiente, Francisco Kalbuadi Lay, Embaixadór Roberto Soares, no Adidu Defeza Timor-Leste iha Indonézia, Koronél Renilde Guterres Cortereal e Silva. (/SMnews)
Komentariu