Smnewstl.com – | Dili, 27 Abril 2026 – Ministru Administrasaun Estatál, Tomás do Rosário Cabral, hala’o reuniaun importante ho Embaixadora Austrália iha Timor-Leste, Caitlin Wilson, hodi diskute koordenasaun servisu estratéjiku sira ne’ebé sei implementa iha tempu badak.
Reuniaun ne’e foka ba rezultadu husi avaliasaun kondisaun mínima faze dahuluk, inklui rekomendasaun sira ne’ebé mos sai husi vizita delegasaun ida ne’ebé hetan partisipasaun husi Primeiru Ministru.
Diskusaun ne’e sai hanesan pasu konkretu atu asegura preparasaun ba faze tuir mai iha implementasaun poder lokál.
Iha enkontru ne’e, Embaixadora Austrália hatudu prontidaun Governu Austrália nian liu husi programa PARTISIPA atu reforsa asisténsia téknika iha faze daruak, tantu iha nivel nasionál no munisipál, tuir liña politika Governu Konstitusionál da Sia.
Iha sorin seluk, Ministru Tomás do Rosário Cabral aprezenta prioridade sira MAE nian ba períodu 2026–2027, ne’ebé inklui kontinuidade apoiu husi Austrália ba etapa importante sira iha implementasaun poder lokál.
Fokus prinsipál mak atu asegura funsionamentu efikás servisu munisipál sira, ne’ebé agora dadaun tama ona iha kompeténsia Prezidente Autoridade Munisipal, ho apoiu tékniku husi ministériu sentrál.
Alemde ne’e, programa sira mos inklui formasaun espesífika no asisténsia téknika ba estrutura Autoridade Munisipál sira, atu garante kapasidade institusionál ne’ebé forte no sustentável.
Reuniaun ne’e realiza iha sala Gabinete Ministru MAE, ho partisipasaun husi Xefe Gabinete MAE, Benigno H. da Cruz, Diretora Jerál Simplifikasaun, Modernizasaun no Administrasaun Lokál, Maria Goretti Marques Belo, no Diretor Nasionál Formasaun no Koperasaun, Cesar José Martins da Silva, hamutuk ho ekipa husi Embaixada Austrália no programa PARTISIPA. (/SMnews)
Komentariu