SMNewstl.com | Turiskai, 14 Agostu 2026 — Primeiru-Ministru (PM) Kay Rala Xanana Gusmão, akompaña husi Ministru Obras Públikas, Samuel Marçal, observa diretamente progresu projetu reabilitasaun estrada Urahou–Turiskai, ne’ebé liga Postu Administrativu Maubisse, Munisípiu Ainaro, ho Postu Administrativu Turiskai, Munisípiu Manufahi.
Ministru Obras Públikas, Samuel Marçal, hateten katak nia mak konvida Primeiru-Ministru hodi vizita no haree diretamente progresu projetu ne’e, ne’ebé iha naruk kuaze 21 quilómetru no kontratu asina ona iha tinan 2024.
“Ha’u mak konvida Primeiru-Ministru hodi vizita projetu reabilitasaun estrada Urahou ba Turiskai. Estrada ne’e kuaze 21 quilómetru, ne’ebé kontratu asina ona iha tinan 2024,” hateten Samuel Marçal.
Governante ne’e esplika katak ezekusaun projetu hasoru dezafiu balu ne’ebé halo progresu obra la’o kleur liu husi planu. Entre dezafiu sira mak kondisaun udan boot iha área Turiskai no Ainaro, ne’ebé halo servisu iha terrenu sai difísil, no difikuldade atu transporta materiál tanba kompañia sira presiza foti materiál husi Same, Munisípiu Manufahi.
“Parte Turiskai no Ainaro udan nunka para, no materiál mós susar tanba sira tenke ba foti fali iha Same. Tanba ne’e progresu tarde uitoan,” nia hateten.
Ministru Obras Públikas mós hateten katak problema rai monu ne’ebé mosu iha área projetu la fó impaktu boot ba ezekusaun obra. Dezafiu boot liu mai husi kondisaun klima no difikuldade atu hetan no transporta materiál ba fatin projetu.
Maski hasoru dezafiu sira ne’e, progresu projetu agora atinji ona kuaze 60 porsentu. Husi total naruk estrada, kuaze 4 quilómetru tau ona alkatraun, enkuantu kompañia sira daudaun ne’e kontinua halo servisu base course iha área ho naruk kuaze 8 quilómetru, ne’ebé sei prepara atu tau alkatraun iha tempu besik.
Orsamentu ba projetu ne’e, tuir Ministru Obras Públikas, hamutuk US$3.4 millaun, ho durasaun konstrusaun tinan ida-resin.
Ho progresu ne’e, hela de’it kuaze 9 quilómetru atu kompleta estrada to’o tama iha área Turiskai.
Samuel Marçal husu ba kompañia responsavel atu aselera servisu iha terrenu, ho objetivu atu bele konklui projetu reabilitasaun estrada Urahou–Turiskai iha fulan Dezembru 2026.
“Entaun ita husu ba kompañia atu aselera servisu hodi konklui obra ne’e iha fulan Dezembru nia laran,” dehan Ministru Obras Públikas.
Enkuantu ba projetu jestaun no reabilitasaun estrada urbana iha laran Turiskai, Ministru Samuel Marçal hateten katak projetu ne’e sei presiza tempu naruk liu, ho previsão bele konklui iha tinan 2027.
Projetu estrada Urahou–Turiskai konsidera importante tanba sei hadi’a koneksaun estrada entre Munisípiu Ainaro no Manufahi, no fasilita movimentu komunidade, transporte materiál no atividade ekonomia iha área rurál sira.
Komentariu