SMnewstl.com DILI || 21 Abril 2026 – Ministru Obras Públikas, Samuel Marçal, klarifika katak atrazu iha prosesu reabilitasaun estrada Gleno–Letefoho akontese tanba Governu Timor-Leste presiza kumpri uluk kritéria no prosedimentu rigorozu husi Banku Mundial, molok implementa projetu.
“Tanba osan ne’e empréstimu, ita tenke tuir kritéria Banku Mundial. Osan ne’e boot, la’ós foti de’it depois la hatene nia aspétu tékniku. Estrada ne’e presiza halo ho kualidade atu dura tempu naruk,” dehan Ministru.
Samuel Marçal esplika tan katak projetu ne’e hala’o liu husi prosesu tenderizasaun internasionál, nune’e governu obrigadu atu kumpri regra aprovizionamentu no padraun internasionál atu garante transparénsia no responsabilidade.
Nia subliña katak konstrusaun estrada Gleno liga ba Letefoho la’ós projetu emerjénsia ne’ebé bele deside lalais, maibé presiza planeamentu metin no prosedimentu kompletu atu asegura rezultadu di’ak no sustentável ba tempu naruk. (/SMnews)
Komentariu