SMnewstl.com BOBONARO |16 Abril 2026 — Comissão Anti-Corrupção (CAC) deskobre problema boot no kompleksu iha implementasaun projetu konstrusaun UMA DIGNU unidade 25 iha Tunubibi, Munisípiu Bobonaro, ne’ebé agora dadaun konsidera iha kondisaun grave.
Iha monitorizasaun Foin lalais ne’e, hatudu katak progresu fíziku projetu la’o neneik tebes no la tuir prazu kontratu. Maski kontratu estende ona to’o Maiu 2026, progresu foin atinji 48%, hatudu falha séria iha jestaun no implementasaun obra.
Durante Monitorizasaun CAC identifika katak kompañia kontraktór la iha kapasidade finanseira suficiente, halo fornesimentu materiál la kompletu, la tuir espesifikasaun no mós tarde. Kondisaun ne’e afeta diretamente kalidade konstrusaun no produtividade traballadór sira, balun mak seidauk simu pagamentu no la iha kontratu klaru.
Iha aspetu tékniku, ekipa CAC nota fraqueza iha supervizaun husi parte Ministériu Dezenvolvimentu Rurál no Habitasaun (MDRH). Engineiru sira iha terenu falta rekursu no fasilidade básiku, inklui dokumentasaun importante hanesan dezeñu no BoQ, ne’ebé devia sai baze ba kontrolu obra.
Observasaun iha terenu revela mós katak barak elementu konstrusaun la tuir padraun tékniku. Estrutura uma balun hahú aat, materiál hanesan besi no baut ferujen, no koneksaun panel la forte. Infraestrutura importante hanesan bee no sistema sanitasaun mós la implementa tuir regra.
Alende problema tékniku, komunidade lokal mós sente impaktu negativu, inklui uza eletrisidade privadu hodi apoiu servisu konstrusaun, ne’ebé lori prejuízu finanseiru ba rezidente sira.
CAC alerta katak situasaun ne’e fó risiku boot ba korrupsaun, liu-liu iha forma fraude konstrusaun no má jestaun orsamentu públiku. Sistema kontrolu husi entidade relevante sira konsidera seidauk efetivu.
Hodi responde ba situasaun ne’e, CAC rekomenda atu parte relevante sira hadi’a jestaun, aumenta rigor iha supervizaun no asegura implementasaun tuir dokumentu tékniku. Relatóriu detalhadu sei prepara atu fó orientasaun estratéjika ba prevensaun korrupsaun no hadi’a governasaun projetu iha futuru.(/SMnews)
Komentariu