SMnewstl.com | SEÚL, Koreia do Sul, 6 Novembru 2026 – Prezidente Repúblika Demokrátika Timor-Leste, José Ramos-Horta, hato’o konvite ofisiál ba Prezidente Repúblika Koreia do Sul, Lee Jae-myung, atu iha oportunidade ida-ne’ebé nia agenda permite, realiza vizita ofisiál ba Timor-Leste.
Konvite ne’e hato’o iha sorumutu bilaterál entre lider na’in rua, ne’ebé hala’o iha Blue House (Palásiu Prezidensiál Koreia do Sul), iha Seúl.
Iha sorumutu ne’e, Prezidente Ramos-Horta manifesta ninia hakarak atu Prezidente Lee Jae-myung sai nu’udar Prezidente Repúblika Koreia dahuluk no mós lider dahuluk husi rejiaun Nordeste Áziatiku ne’ebé realiza vizita ofisiál ba Timor-Leste.
Konvite ne’e reflete kompromisu Timor-Leste atu kontinua hametin amizade, relasaun diplomátika no kooperasaun bilaterál ho Repúblika Koreia, liuliu iha área sira ne’ebé fó benefísiu ba nasaun rua no povu sira.
Hatudu resposta ba konvite ne’e, Prezidente Lee Jae-myung hato’o ninia agradese ba Prezidente Ramos-Horta no promete atu halo esforsu másimu, tuir ninia disponibilidade no agenda ofisiál, hodi bele realiza vizita ba Timor-Leste.
Prezidente Lee mós subliña katak istória no esperiénsia ne’ebé nasaun rua liu ba, liuliu iha prosesu restaurasaun demokrasia, iha elementu hanesan ne’ebé iha signifikadu importante ba relasaun no amizade entre povu rua.
Iha kontestu ne’e, Prezidente Lee hato’o agradese ba Prezidente José Ramos-Horta tanba ninia deklarasaun atu apoia no rekomenda povu Repúblika Koreia ne’ebé partisipa iha movimentu Revolusaun Naroman (*Light Revolution*) nu’udar kandidatu ba Prémio Nobel Dame.
Nia konsidera apoiu no rekomendasaun husi Prezidente Ramos-Horta nu’udar kontribuisaun importante, ne’ebé fó signifikadu espesiál ba amizade no solidariedade entre nasaun rua.
Iha parte ikus, Prezidente José Ramos-Horta hato’o ninia agradese ba Prezidente Lee Jae-myung, Governu no Povu Repúblika Koreia, tanba sira-nia generozidade, amizade no apoiu estraordináriu ne’ebé kontinua fó ba Timor-Leste.
Komentariu